Նախընտրելի
Ամերիկացի հետազոտողները հրապարակել են երեք տեղանոց սուզանավով ստորջրյա Կուկա հրաբխի հետազոտման արշավի արդյունքները, հրաբուխը գտնվում է Հավայան կղզիների մոտակայքում, հայտում է St. Louis Post-Dispatch թերթը:
Չորս կմ խորության վրա գտնվող ստորջրյա հրաբխի հետազոտման արշավի ընթացքում հետազոտողները միանգամից մի քանի բացահայտում են արել: Նախ` ութոտնուկի նոր տեսակ են հայտնաբերել, որի հսկայական լողակները հիշեցնում են «Դամբո» մուլտֆիլմի փղիկի ականջները: Երկրորդ` գիտնականները մանուշակագույն մարջանի նոր տեսակ են հայտնաբերել, որն անվանել են «Մանուշակագույն մշուշ» (Purple Haze) ի պատիվ Ջիմի Հենդրիքսի երգի:
Հետազոտողները պնդում են, որ հրաբխի շրջանում` հատակում բազմաթիվ գիտությանն անհայտ կենդանիներ կարող են լինել: Մասնավորապես, խոսքը վերաբերում է այնպիսի տեսակների, որոնք լույսի առկայության կարիք չունեն:
Ամերիկացի գիտնականները նախատեսել են արշավներ իրականացնել եւս 50 ստորջրյա հրաբխի վերաբերյալ, որոնք գտնվում են Հավայան կղզիների մոտերքում:
