Հայաստանի կառավարությունը հոկտեմբերի 29-ի նիստում նոր որոշում է կայացրել Արցախից բռնի տեղահանված անապահով ընտանիքներին տրամադրվող սոցիալական աջակցության ծրագրի վերաբերյալ։
Մասնավորապես, առանձին խմբերի հատկացվող ամսական 30 հազար դրամ (խմբ.՝ մոտ 83 ԱՄՆ դոլար) աջակցության ժամկետը երկարաձգվել է մինչև 2027 թվականի հուլիսը։
Միաժամանակ, 2027 թվականի ապրիլից այդ գումարի չափը կկրճատվի՝ դառնալով ամսական 15 հազար դրամ։
Կառավարության այլ որոշմամբ մինչև 2027 թվականի դեկտեմբերը երկարաձգվել է Լեռնային Ղարաբաղից բռնի տեղահանված կարիքավոր ընտանիքների լրացուցիչ արտակարգ սոցիալական աջակցության ծրագիրը:
Աջակցության չափը կազմում է ամսական 40 հազար դրամ ընտանիքի առաջին տեղահանված անդամի և 10-ական հազար դրամ՝ յուրաքանչյուր հաջորդի համար:
Աջակցության ստացողներ կարող են հանդիսանալ այն ընտանիքները, որոնցում մեկ անդամի հաշվով միջին ամսական եկամուտը 55 հազար դրամից պակաս է կազմում:





























