նախընտրելի դարձնելՄԱԿ-ի Զարգացման ծրագիրը՝ Եվրոպական միության աջակցությամբ եւ ՀՀ արդարադատության նախարարության գործընկերությամբ, հայտարարել է նորարար գաղափարների մրցույթ՝ ՀՀ արդարադատության նախարարության աշխատակիցների շրջանում:
ԱՆ-ից NEWS.am-ին հայտնում են, որ մրցույթը նպատակ ունի օգտագործել պետական կառավարման համակարգի ներսում կուտակված գիտելիքը եւ փորձը՝ աշխատանքային գործընթացներն օպտիմիզացնելու, հանրային ծառայություններն առավել մասնակցային դարձնելու եւ հետադարձ կապի արդյունավետ գործիքակազմի ներդրման համար: Մրցույթին մասնակցելու համար աշխատակիցները կարող են ներկայացնել աշխատանքի ընթացքում բացահայտած խնդիրը եւ նկարագրել առաջարկվող նորարար լուծումը: Լուծումը պետք է վերաբերի
1) վարչարարության կամ կառավարման պրոցեսների օպտիմիզացմանը
2) քաղաքացու հետ հետադարձ կապի հեշտ եւ արագ գործիքների ներդրմանը
3) կառավարման թափանցիկության ու հաշվետվողականության նպաստմանը։
Նորարար գաղափարների մրցույթը բաց է ՀՀ արդարադատության նախարարության բոլոր աշխատակիցների համար: Մրցույթին մասնակցելու համար անհրաժեշտ է լրացնել համապատասխան էլեկտրոնային հայտը: Գաղափարների ներկայացման վերջնաժամկետն է 2016 թ. հոկտեմբերի 31-ը: Ներկայացված հայտերը դիտարկելու է ՄԱԿ-ի Զարգացման ծրագրի, Եվրոպական միության եւ ՀՀ Կառավարության ներկայացուցիչներից կազմված միասնական հանձնաժողովը: Հաղթող կարող են ճանաչվելու այն գաղափարները, որոնք՝
1) նորարար մոտեցում են առաջարկում
2) իրատեսական են
3) համապատասխանում են գործընթացի օպտիմիզացման եւ/կամ հետադարձ կապի ապահովման պահանջներին: Հաղթող գաղափարների հեղինակները կստանան մրցանակներ եւ գաղափարը փորձարկելու հնարավորություն: Հաղթած գաղափարների իրականացման համար տեխնիկական եւ ֆինանսական աջակցությունը տրամադրելու է ՄԱԶԾ ծրագիրը:
Մրցույթն իրականացվում է «Նորարար առաջընթաց» (#Inno4Dev) ծրագրի շրջանակներում, որն իրականացվելու է Հայաստանում 2015-2018 թվականներին՝ ՄԱԶԾ Կոլբա նորարարական լաբորատորիայի միջոցով: Ծրագրի փիլիսոփայության հիմքում քաղաքացին է, որին առանցքային դեր է տրվում քաղաքականության մշակման եւ զարգացման ծրագրերի իրականացման ընթացքում: Ծրագիրն իրականացվելու է երեք հիմնական ուղղություններով՝ քաղաքացիներից եկող գաղափարների ինկուբացում, հանրային իրազեկում եւ կառավարման նորարարություն: Վերջինին ներգրավված է նաեւ բրիտանական FutureGov խորհրդատվական ընկերությունը, որը համարվում է առաջատար կառավարման նորարարության լուծումների մշակման եւ իրականացման ոլորտում:
