նախընտրելի դարձնելԵրեւանի քաղաքապետարանում կայացած աշխատանքային հերթական խորհրդակցության ժամանակ զեկուցվել է, որ մայրաքաղաքի բազմաբնակարան շենքերում շարունակվում են իրականացվել ձմռան նախապատրաստական աշխատանքները, նաեւ համաձայն Երեւանի քաղաքապետ Տարոն Մարգարյանի հանձնարարականի, ըստ անհրաժեշտության վերականգնվում են շենքերի անձրեւատար խողովակները:
Զեկուցվել է նաեւ, որ ջեռուցման համակարգերի անխափան շահագործումն ապահովելու նպատակով, քաղաքապետարանի ենթակայության դպրոցներում, նախադպրոցական, մշակութային եւ առողջապահական հաստատություններում եւս իրականացվում են ձմռան նախապատրաստական աշխատանքներ: Այդ համատեքստում աշխատակազմի հանրակրթության վարչության պետը զեկուցել է, որ մասնավորապես հանրակրթական դպրոցներում իրականացվում են նաեւ դռների եւ պատուհանների ջերմամեկուսացման աշխատանքներ, որոնք կավարտվեն այս շաբաթավերջին:
Խորհրդակցության ժամանակ զեկուցվել է, որ Երեւանի քաղաքապետի հանձնարարությամբ աշխատակազմի արտաքին ձեւավորման եւ գովազդի վարչությունը ՀՀ ԿԳՆ լեզվի պետական տեսչության հետ համատեղ մայրաքաղաքում կատարած ստուգայցերի արդյունքում հայտնաբերել է օրենքի պահանջին չհամապատասխանող 60 գովազդային վահանակ: Ըստ այդմ, 31 տնտեսվարողի ծանուցվել է սեղմ ժամկետներում վահանակները համապատասխանեցնել օրենսդրությանը, 29 գովազդային վահանակ էլ ապամոնտաժվել է: Հանձնարարվել է շարունակել այդ ուղղությամբ հետեւողական աշխատանքները:
Զեկուցվել է, որ ի կատարումն քաղաքապետի հանձնարարականի՝ նախորդ շաբաթ գույքագրվել են վարչական շրջանների բոլոր գետնանցումները, որի արդյունքում 18 գետնանցումներում արձանագրվել են թերություններ: Հանձնարարվել է շարունակել խիստ հսկողությունն ու քայլեր ձեռնարկել սեղմ ժամկետներում սեփականատերերի եւ վարձակալների միջոցներով բոլոր գետնանցումները պատշաճ տեսքի բերելու ուղղությամբ:
Մայրաքաղաքում ապօրինի շինարարության եւ հողազավթումների հայտնաբերման ու կանխման ուղղությամբ տարվող ամենօրյա հսկողության արդյունքում նախորդ շաբաթ կազմվել է 11 վարչական արձանագրություն:
Զեկուցվել է, որ շարունակական հսկողություն է իրականացվում նաեւ մայրաքաղաքի տարածքում գործող հասարակական նշանակության օբյեկտները պոլիէթիլենային տոպրակներով ծածկելու դեպքերը բացառելու ուղղությամբ: Նախորդ շաբաթ արձանագրվել է նման 14 դեպք, որոնք բոլորը վերացվել են:
Բացօթյա ապօրինի առեւտրի հայտնաբերման նպատակով նախորդ շաբաթվա ընթացքում, այդ թվում հանգստյան օրերին, վարչական շրջաններում կազմակերպված ստուգայցերի ընթացքում 5 վարչական արձանագրություն է կազմվել: Նույն ժամանակահատվածում ապամոնտաժվել է 4 լքյալ կրպակ: Քաղաքացիների, ինչպես նաեւ իրավաբանական անձանց կողմից աղբը ոչ սահմանված վայրերում թափելու դեպքերի հայտնաբերման եւ երեւույթի կանխարգելման ուղղությամբ տարվող աշխատանքների ընթացքի վերաբերյալ էլ զեկուցվել է, որ նախորդ շաբաթ կազմվել է 61 վարչական արձանագրություն: Հանձնարարվել է բոլոր ուղղություններով շարունակել ամենօրյա խստացված հսկողությունը:
Զեկուցվել է, որ մայրաքաղաքում շարունակվում են այգիների մաքրման եւ ծառերիի խնամքի աշխատանքները։ Ըստ ժամանակացույցի՝ շարունակվում է նաեւ չոր եւ ընկնելու վտանգ ներկայացնող ծառերի էտը: Զուգահեռաբար սկսվել են աշնանային ծառատունկի եւ շաբաթօրյակի նախապատրաստական աշխատանքները:
Խորհրդակցության ավարտին զեկուցվել է նաեւ, որ ստեղծվել է աշխատանքային խումբ եւ ձեռնարկվում են անհրաժեշտ միջոցներ՝ ս.թ. նոյեմբերի 9-12-ը «Սանկտ–Պետերբուրգի օրերի» շրջանակներում Երեւան քաղաքում նախատեսվող միջոցառումները բարձր մակարդակով կազմակերպելու եւ անցկացնելու համար:
