ՆախընտրելիՀարավային Կորեայի դատախազությունը թույլատվություն է պահանջել նախագահ Պակ Կին Խեի գուշակուհի ու մտերիմ ընկերուհի Չխվե Սուն Սիլին կալանավորելու համար՝ նրա շուրջ բարձրացած աղմուկի պատճառով, հայտնում է «Յոնհափ» գործակալությունը։
Հոկտեմբերի 31-ին կնոջը ձերբակալել են, նրան կասկածում են պետական գործերին միջամտելու մեջ։ Նաեւ կասկածում են, որ նա օգտագործել է իր ազդեցությունը, ստիպելով խոշոր հարավկորեական կորպորացիաներին բազմամիլիոն նվիրատվություններ անել իր հետ առնչություն ունեցող երկու հիմնադրամներին։
Երկրի իշխանությունները վախենում են, որ ազատության մեջ մնալու դեպքում 60-ամյա կինը կարող է ազդել հետաքննության ընթացքի վրա։
Նա անցած հանգստյան օրերին է Եվրոպայից ժամանել հարցաքննության համար և հերքում է իր դեմ առաջադրված մեղադրանքները։
Չխվե Սուն Սիլը Չխվե Տխե Մինի դուստրն է, որը երկրում շամանական պաշտամունքի առաջնորդն է։ Պակ Կին Խեն նրանց ընտանիքի հետ մտերմացել է այն բանից հետո, երբ 1974-ին սպանվել է ապագա նախագահի մայրը։
Սեուլում ուժգնանում է սկանդալը, որի հետևանքով նախագահին իմփիչմենթի ենթարկելու սպառնալիք է ստեղծվել։ Նրան մեղադրում են իրեն աղանդավորներով ու գուշակներով շրջապատելու մեջ, որոնք կարող էին իմանալ պետական գաղտնիքներն ու ազդել պետության քաղաքական կուրսի վրա։
