Շուտով Հայաստանի կառավարությանը կներկայացվի Նորարարության ազգային ռազմավարությունը։  Այսօր՝ դեկտեմբերի 15-ին այս ռազմավարությանը նվիրված սեմինար էր կազմակերպվել «Արմենիա Մարիոթ» հյուրանոցում, որին ներկա էին Հայաստանի էկոնոմիկայի նախարար Ներսես Երիցյանը եւ տեղեկատվական հեռահաղորդակցական տեխնոլոգիաների ոլորտի ընկերությունների ղեկավարներ։
Նորարարության ազգային ռազմավարությունը մշակել է «Ի-Վի Քընսալթինգ» ընկերությունը։ Ընկերության տնօրեն Մանուկ Հերգնյանի խոսքով՝ նորարարության ռազմավարությունը դիտվում է որպես դինամիկ գործընթաց, այսինքն՝ նախատեսվում է դրա պարբերական վերանայում:
«Անհրաժեշտ է Հայաստանը դարձնել գլոբալ տեխնոլոգիական ընկերությունների հետազոտությունների եւ մշակումների համար առավել իրատեսական կենտրոն»,-ասաց Մ. Հերգնյանը՝ հղում կատարելով հայեցակարգին։
Հայեցակարգի իրականացման նախնական փուլում, ըստ Մ. Հերգնյանի, պետության ներդրումը պետք է զգալի լինի, որը, սակայն, այնուհետեւ պետք է կրճատվի՝ տեղի տալով մասնավոր նախաձեռնություններին։
Նշենք, որ «Դեպի Հայաստանի նորարարության ազգային ռազմավարություն» սեմինարը կազմակերպվել էր Հայաստանի էկոնոմիկայի նախարարության, ԱՄՆ ՄԶԳ CAPS ծրագրի, է «Ի- Վի Քընսալթինգ» ընկերության եւ Ձեռնարկությունների ինկուբատոր հիմնադրամի  ջանքերով։ Կազմակերպիչները համոզված են, որ այս ռազմավարությունը «դարակում չի մնա», այլ կլինի ժամանակին համընթաց եւ ճկուն՝ առաջացող մարտահրավերներին եւ փոփոխություններին արձագանքելու համար։