նախընտրելի դարձնել
Այսօր՝ դեկտեմբերի 24-ին «Կոնվերս բանկի» աշխատակիցները «Դարձիր Ձմեռ պապ» բարեգործական ակցիայի շրջանակներում «Ձմեռ Պապի» հագուստներ հագած բազմապիսի նվերներ է հանձնել «Մարի Իզմիրլյան» մանկատան սաներին:
Նվերների շարքում են եղել բջջային հեռախոս, հեծանիվ, DVD, համակարգչային խաղեր, բազմաթիվ տիկնիկներ, խաղալիք ավտոմեքնաներ, տարբեր սեզոնների հագուստեղեն, տակդիրներ, ներքնաշորեր, ամենաբազմազան խաղալիքներ ու քաղցրավենիք:
«Կոնվերսբանկից» NEWS.am-ին հայտնում են, որ թվարկված նվերներից բացի բանկում բացված հաշվեհամարի եւ հանգանակության արկղում կուտակված գումարի միջոցով մանկատան համար ձեռք է բերվել հեռուստացույց, գորգեր եւ այլ անհրաժեշտ կենցաղային պարագաներ:
Մոտ 20 օր տեւած «Դարձիր Ձմեռ պապ» բարեգործական ակցիան ակտիվություն էր առաջացրել բանկի հաճախորդների եւ աշխատակցիների շրջանում:
Հիշեցնենք, որ ակցիայի շրջանակներում, բանկի աշխատակիցները «Մարի Իզմիրլյան» մանկատան երեխաներից նախօրոք պարզել էին մանկատան սաների ամանորի ցանկությունները` կապված Ձմեռ պապի նվերի հետ: Այնուհետեւ, սաների ցանկություններն ու նրանց լուսանկարները փակցվել էին բանկում տեղադրված տոնածառի ճյուղերին: Տոնածառի խորհրդանշական խաղալիքների միջոցով էլ բանկի հաճախորդներն ու աշխատակիցները տեղեկանում եւ իրականացնում էին սաների ցանկությունները:
Բարեգործական ակցիային բազմաթիվ անհատ քաղաքացիների կողքին իրենց ներդրումն են ունեցել նաեւ բանկի կորպորատիվ հաճախորդներին ու տարբեր կազմակերպություններ: Բանկը ակտիվ մասնակցության համար երախտագիտություն է հայտնում բոլոր բարերարներին, այդ թվում BASIC HOUSE-ին, CROCS-ին, «Արաբկիր» բժշկական կենտրոնին, International Bildungsterein fur Klassischer Music` գերմանական ընկերությանը, «Արմենիա» միջազգային օդանավակայաններին, ռադիո «Վանին», «Երկիր մեդիա», Հ1, «Արմենիա» հեռուստաընկերություններին:
