նախընտրելի դարձնելՀՀ քննչական կոմիտեի ՀԿԳ քննության գլխավոր վարչությունում ձեռնարկվում են անհրաժեշտ քննչական եւ դատավարական այլ գործողություններ՝ «Factor.am» կայքի գլխավոր խմբագիր Արեւիկ Սահակյանի մասնագիտական գործունեությանը խոչընդոտելու դեպքի հանգամանքները պարզելու ուղղությամբ:
2018թ. ապրիլի 18-ին Հայաստանի ժուռնալիստների միությունը հաղորդագրություն է տարածել առ այն, որ 2018թ. ապրիլի 17-ի լույս 18-ի գիշերը Երեւանի Մաշտոց-Թումանյան փողոցների խաչմերուկում տեղի ունեցած իրադարձությունների ընթացքում անհայտ անձինք բռնություն են կիրառել «Factor.am» կայքի գլխավոր խմբագիր Արեւիկ Սահակյանի նկատմամբ։ Մի քանի երիտասարդներ քաշքշել են լրագրողին, պոկել նրա լրագրողական վկայականը, ինչպես նաեւ՝ վնասել տեղում աշխատող օպերատորի տեխնիկան։
Դեպքի առթիվ ՀՀ ՔԿ ՀԿԳ քննության գլխավոր վարչությունում հարուցվել է քրեական գործ՝ ՀՀ քրեական օրենսգրքի 164-րդ հոդվածի 1-ին մասով՝ մի խումբ անձանց կողմից լրագրողի մասնագիտական օրինական գործունեությանը խոչընդոտելու եւ նրան տեղեկություններ տարածելուց հրաժարվելուն հարկադրելու դեպքի առթիվ:
Միաժամանակ քննիչը որոշում է կայացրել` նշված քրեական գործը միացնել 2018թ. ապրիլի 17-ին Երեւան քաղաքի Մաշտոց-Թումանյան փողոցների խաչմերուկում տեղի ունեցած զանգվածային անկարգությունների դեպքի առթիվ քննվող քրեական գործին եւ քրեական գործերի հանգամանքների լրիվ, օբյեկտիվ եւ բազմակողմանի քննությանը նպաստելու նպատակով նախաքննությունը շարունակել մեկ վարույթում:
Նախաքննությունը շարունակվում է: Միջոցներ են ձեռնարկվում՝ դեպքերի բոլոր հանգամանքները պարզելու ուղղությամբ:
