Սաուդյան Արաբիայի եւ Կանադայի միջեւ դիվանագիտական սկանդալը չի ազդի սաուդյան  նավթի վաճառքի վրա: Այս մասին հայտարարել է Սաուդյան Արաբիայի էներգետիկայի նախարար Խալիդ ալ-Ֆալիխը, հաղորդում է AP-ն:

Նրա խոսքով՝ քաղաքականությունը չի ազդում նավթի վաճառքի վրա, քանի որ   «կոշտ ու հին դիրքորոշում գոյություն ունի, որի վրա քաղաքական հանգամանքները չեն ազդում»:

 «Սաուդյան Արաբիայի եւ Կանադայի միջեւ առկա դիվանագիտական ճգնաժամը չի անդրադառնա Կանադայում իր հաճախորդների հետ Սաուդյան Արաբիայի հարաբերությունների վրա», - նշված է նախարարի հայտարարության մեջ:

Կանադան, ով աշխարհում էներգիայի հինգ խոշորագույն արտադրողներից մեկն է հանդիսանում, Սաուդյան Արաբիայի նավթի մոտ 10 տոկոսն է ներմուծում:

Երկու երկրների միջեւ ապրանքաշրջանառությունը տարեկան կազմում է 3 միլիարդ դոլար:

Հիշեցնենք, որ Սաուդյան Արաբիայում ձերբակալված ակտիվիստներին ազատելու Կանադայի կոչից հետո Ռիադը հետ կանչեց իր դեսպանին եւ Կանադայի դեսպանին երկրից արտաքսեց: Բացի այդ, Կանադայի հետ առեւտրային բոլոր նախագծերը կասեցվել են: