նախընտրելի դարձնել
Հայ մասնագետները ստեղծել են չրերի արտադրության հեռակառավարման յուրահատուկ տեխնոլոգիա: Նոու հաուն Երեւանի Կապի միջոցների գիտահետազոտական ինստիտուտի, «Սուրեն-Անի» ՍՊԸ-ի եւ Շուշիի Տեխնոլոգիական համալսարանի մասնագետների համատեղ աշխատանքի արդյունքն է:
NEWS.am-ի հետ զրույցում գիտահետազոտական ինստիտուտի տնօրեն Մհեր Մարկոսյանը նշեց, որ հեռակառավարման տեխնոլոգիան հնարավորություն է տալիս բջջային հեռախոսներից վերահսկել 150 չորացնող վառարանների աշխատանքը:
«Տեխնոլոգիաները մրգի յուրաքանչյուր տեսակի համար առանձին անհրաժեշտ պարամետրեր են սահմանում: Մշակվում է համապատասխան ծրագիր, որը հնարավորություն է տալիս լիովին վերահսկել արտադրական գործընթացը », - ասաց Մարկոսյանը:
Ըստ նրա, այս տեխնոլոգիան առաջին անգամ է օգտագործվում չրերի արտադրության ոլորտում: Արտադրական գործընթացը կարելի է վերահսկել աշխարհի ցանկացած վայրից՝ ինտերնետին միանալու հնարավորության պայմանով:
Փորձարարական նմուշի փորձարկման գործընթացը սկսվել է մեկ ամիս առաջ, եւ առաջիկայում կստացվեն վերջնական արդյունքները:
