Խոսքի ազատության պաշտպանության կոմիտեն, Երեւանի մամուլի ակումբը եւ Լրագրողների «Ասպարեզ» ակումբը հանդես են եկել հայտարարությամբ՝ կապված նախօրեին Շիրակի մարզի ընդհանուր իրավասության դատարանի` «ԳԱԼԱ» հեռուստաընկերության դեմ կայացրած որոշման հետ:

Հիշեցնենք, որ փետրվարի 16-ին Շիրակի մարզի ընդհանուր իրավասության դատարանը բավարարել է Գյումրու քաղաքապետարանի հայցը եւ «ԳԱԼԱ» հեռուստաընկերության հիմնադիր «ՉԱՊ» ՍՊԸ-ին պարտավորեցրել է մեկամսյա ժամկետում ապամոնտաժել Գյումրու Վ. Սարգսյան 6/1 հասցեում գտնվող հեռուստաաշտարակի գագաթնային հատվածում տեղադրված հաղորդիչ ալեսփյուռն ու մալուխը: «ԳԱԼԱ» հեռուստաընկերությունը հայտարարել է, որ մտադիր է վճիռը բողոքարկել վերաքննիչ դատարանում:

 «Երեք տարուց ավելի տեւած, դատական բոլոր ատյաններով անցած ու վճռաբեկ դատարանի կողմից հօգուտ «ԳԱԼԱ»-ի բեկանված գործի քննության հերթական փուլում ընդունված նման վճիռը, մեր գնահատմամբ, իշխանական տարբեր օղակների կողմից հեռուստաընկերության դեմ 2007 թվականից նախաձեռնված ճնշումների շարունակությունն է եւ նոր սպառնալիքներ է ստեղծում խոսքի ու լրատվամիջոցների ազատության համար:

Մենք՝ ներքոստորագրյալ լրագրողական կազմակերպությունների ներկայացուցիչներս, կոչ ենք անում իրավասու ատյաններին՝ քայլեր ձեռնարկելու ոչնչով չարդարացված այս հետապնդումները վերացնելու համար: Գալիք ընտրություններից առաջ մեծապես կարեւորում ենք լրատվամիջոցների նկատմամբ ճնշումների դադարեցումը` տեղեկատվական ոլորտում առողջ մթնոլորտ ապահովելու նկատառումներով»,-ասված է լրագրողական կազմակերպությունների հայտարարության մեջ: