Սբ. Գեղարդավանքի երգչախումբը (գեղ. ղեկավար` Մհեր Նավոյան, խմբավար` Անահիտ Պապայան) փետրվարի 14-21-ին համերգներով հանդես է եկել  Գերմանիայի Հայդենհայմ, Շտուտգարտ, Գյոպինգեն եւ Հանաու քաղաքներում:

Սա երգչախմբի հինգերորդ այցն էր Գերմանիա` Գեղարդավանքի եւ Գերմանիայի Լորշ վանք-գիտահետազոտական ինստիտուտի համագործակցության շրջանակներում: Երգչախումբը գերմանացի ունկնդրին ներկայացրեց հայ հոգեւոր եւ ժողովրդական երգերի մշակումներ:

Առաջին համերգը կայացել է Հայդենհայմ քաղաքի Ս. Միքայել եկեղեցու լեփ-լեցուն սրահում:

Այս երգչախմբի հետ «Շիլլեր գիմնազիումի»  փորձասրահում տեղի է ունեցել հանդիպում-փորձ, որի ընթացքում Ա. Պապայանի խմբավարությամբ գերմանական երգչախմբի երիտասարդ անդամները սովորեցին Կոմիտասի` «Ելա տանիս» ժողովրդական երգի մշակումը: Այնուհետ Neuer Kammerchor-ի անդամները կատարել են Ռ. Ամիրխանյանի «Երազի իմ երկիր» ստեղծագործությունը, որը սովորել էին դեռ անցյալ տարի Հայաստան կատարած համերգային ուղեւորության առիթով:

Հատկապես նշանակալի էր տարբեր երկրներից ժամանած երգչախմբերի համատեղ համերգը Շտուտգարտում, որի ընթացքում հայկական երգչախմբին տրված էր առավելագույն տեւողությամբ ելույթի հնարավորություն: Ուշագրավ էր միացյալ երգչախմբի` Յ. Ս. Բախի Singet dem Herrn ստեղծագործության մի հատվածի կատարումը` նշանավոր դիրիժոր Հելմուտ Ռիլլինգի ղեկավարությամբ: Վերջինս բարձր գնահատեց հայաստանյան խմբի կատարումները:

Գյոպինգեն եւ Հանաու քաղաքներում երգչախմբին ջերմորեն հյուրընկալել են տեղի հայ համայնքները`  Տ. Սերովբե վարդապետ Իսախանյանի եւ Տ. Տիրատուր քահանա Սարդարյանի գլխավորությամբ: Փետրվարի 19-ին Գյոպինգենում, իսկ փետրվարի 20-ին Հանաուում մատուցվել է Սբ. Պատարագ` Գեղարդավանքի երգչախմբի մասնակցությամբ: