Կենտուկիից զույգը գտնվում է տնային կալանքում, քանի որ հրաժարվել էր կարանտին պահպանել կորոնավիրուսով վարակվելուց հետո, հաղորդում է Americaru-ն։

Էլիզաբեթ եւ Իսաիա Լինսքոթը հրաժարվել են ստորագրել մեկուսացման ռեժիմը պահպանելու մասին փաստաթղթերը։

Էլիազաբեթ Լինսքոթը (Elizabeth Linscott) վարակվել էր կորոնավիրուսով, սակայն չէր ցանկացել ինքնամեկուսանալ տանը, ուստի իշխանությունները ստիպել էին նրան եւ նրա ամուսնուն պահպանել կարանտինը։ Ամուսինները կրում են մոնիթորներ ձեռքերին, որոնք կտեղեկացնեն իրավապահներին, եթե նրանք լքեն իրենց տունը։

Լինսքոթն ասում է, որ թեստավորման ժամանակ նա որեւէ ախտանշան չի ունեցել, սակայն պատրաստվում էր այցելել իր ծնողներին, տատիկին եւ պապիկին Միչիգանում։ Նրա խոսքով՝ ամուսինները չէին համաձայնվել փաստաթղթերում ձեւակերպումների հետ, որոնք նրանց խնդրել էին ստորագրել։ Սակայն անվտանգության մասին բանավոր համաձայնությունը բավարար չէր առողջապահության դեպարտամենտի համար։