նախընտրելի դարձնելԵրկրի նախագահն իր կադրային քաղաքականությամբ արհամարհում է հասարակական կարծիքը եւ այդպիսով էլ ավելի խորացնում անջրպետը իր եւ հասարակության միջեւ: Այս բովանդակության հաղորդագրություն է տարածել «Ժառանգություն» կուսակցությունը` անդրադառնալով Երեւանի նորանշանակ գլխավոր ճարտարապետի հարցին: Նրանց փոխանցմամբ` սկսած 90-ական թվականների վերջից քաղաքում նոր թափ առավ պատմական եւ մշակութային հուշարձանների վերացման, հանրային տարածքների, կանաչ գոտիների, բակերի եւ մայթերի զավթման հանցագործ գործընթացը:
«Օրենքների կոպիտ խախտումներով եւ մասնագիտական առումով ոչ գրագետ ճարտարապետական ծրագրերը այդ ժամանակվա քաղաքի գլխավոր ճարտարապետի ղեկավարությամբ եւ իշխանությունների հովանավորությամբ մայրաքաղաքի քաղաքաշինական զարգացումը տարել են ծայրահեղ սխալ ուղով` խաթարելով քաղաքի բնականոն կյանքը եւ աղավաղելով մայրաքաղաքի դիմագիծը: Այդ ծրագրերի հիմքում դրված էր անբարո գաղափար` մայրաքաղաքը իր պատմությամբ, մշակույթով, հանրային նշանակության տարածքներով եւ մարդկանցով ծառայեցնել մի խումբ մարդկանց մասնավոր շահերին: Այժմ նախկին գլխավոր Ճարտարապետի վերանշանակումով հաստատվում է, որ ներկա իշխանությունների «Առաջ Հայաստան» կարգախոսը ընդամենը նշանակում էր հասարակության կողմից մերժված, քրեականացված նոմենկլատուրայի մշտական վերադարձ, արատավոր անցյալի վերարտադրում, այսինքն` «Հետ Հայաստան»: Դա նաեւ նշանակում է, որ երկրի նախագահը իր կադրային քաղաքականությամբ արհամարհում է հասարակական կարծիքը եւ այդպիսով էլ ավելի խորացնում անջրպետը իր եւ հասարակության միջեւ: Երկրի ապագայի համար մտահոգ բոլոր առողջ ուժերի եւ քաղաքացիների հետ միասին այսուհետ «Ժառանգություն» կուսակցությունը առավել մեծ վճռականությամբ եւ անհանդուրժողականությամբ պայքարելու է երկրի ապագայի համար խիստ վտանգավոր եւ կործանարար գործընթացների դեմ»,- նշված է «Ժառնագության» հաղորդագրության մեջ:
