նախընտրելի դարձնել
Աֆղանստանում բարձրագույն ուսումնական հաստատությունները շարունակում են փակ մնալ տնտեսական ճգնաժամի պատճառով։ Այս մասին երկուշաբթի հայտնել է հնդկական Hindustan Times թերթը։
«Բուհեր բացելու համար ավելի շատ ժամանակ կպահանջվի։ Նախքան ուսուցման մեկնարկն անհրաժեշտ է լուծել համալսարանների ֆինանսավորման հետ կապված խնդիրները՝ բացելով աղջիկների համար հատուկ դասասենյակներ եւ նրանց համար ուսուցիչներ վարձելով»,- մեջբերում է պարբերականն Աբդուլ Բաքի Հաքքանիի հայտարարությունը, ով նշանակվել է Աֆղանստանում իշխանությունը զավթած արմատական թալիբների կողմից։ Աֆղանստանի Իսլամական Էմիրության բարձրագույն կրթության նախարարի պաշտոնին ժամանակավոր կաբինետում:
Սեպտեմբերի 12-ին Հաքքանին խոստացել էր, որ համալսարանները կվերսկսեն աշխատանքն Աֆղանստանում «մեկ շաբաթվա ընթացքում»։ Ընդ որում, նա խոստովանել է, որ կրթական ոլորտն ամենաշատ տուժածներից մեկն է, նախ՝ կորոնավիրուսի համավարակի, այնուհետեւ` Աֆղանստանում իշխանափոխության պատճառով։
Նախարարի խոսքով՝ Աֆղանստանում կրթական գործընթացը հիմնված է լինելու սեռի վրա. ուսանողներին դասավանդելու են տղամարդ ուսուցիչներ, իսկ կին ուսանողներին՝ կին ուսուցիչներ։ Ուսանողներն ու ուսանողուհիները կսովորեն առանձին։
Անցյալ շաբաթվա վերջին թալիբները հայտարարեցին 170-հոգանոց ոստիկանական նոր ստորաբաժանման ստեղծման մասին, որը կպաշտպանի կրթական հաստատությունները կանանց կրթության հակառակորդների հարձակումներից: «Ուսումնական հաստատությունների պաշտպանության համար հատուկ ստորաբաժանման ստեղծումն անհրաժեշտություն է», - ասել է բարձրագույն կրթության փոխնախարար Լութֆուլլահ Խաիրհավը:
