նախընտրելի դարձնելNEWS.am-ի հավաստի աղբյուրների փոխանցմամբ, հուլիսի 14-ի գիշերը կաշառք վերցնելու կասկածանքով ձերբակալվել է Ոստիկանության Երեւան քաղաքի վարչության աշխատակից Ստեփան Սիմոնյանը:
Այս տեղեկությունը հաստատել է նաեւ Ոստիկանության Հասարակայնության հետ կապերի եւ լրատվության վարչության պետ Աշոտ Ահարոնյանը:
«ՀՀ ոստիկանության ներքին անվտանգության վարչության եւ կազմակերպված հանցավորության դեմ պայքարի գլխավոր վարչության ծառայողների կողմից իրականացրած միջոցառումների շնորհիվ ՀՀ ոստիկանության Երեւան քաղաքի վարչության քրեական հետախուզության բաժնի 3-րդ բաժանմունքի ավագ օպերլիազոր Ստեփան Սիմոնյանը Խանջյան փողոցում մի քաղաքացուց 500 դոլար կաշառք վերցնելու պահին բռնվել է եւ բերման ենթարկվել ԿՀԴՊ ԳՎ»,- ասել է նա:
Նախապատրաստված նյութերը ուղարկվել են ՀՀ հատուկ քննչական ծառայություն: Ստեփան Սիմոնյանը ձերբակալվել եւ հարցաքննվել է որպես կասկածյալ: Քրեական գործով արդեն իսկ նշանակվել են տարաբնույթ փորձաքննություններ, կատարվում են անհրաժեշտ եւ անհետաձգելի քննչական գործողություններ:
Գործով նախաքննությունը շարունակվում է:
Ոստիկանի ձերբակալությունը թերեւս ՀՀ ոստիկանապետ Ալիկ Սարգսյանի նշած ինքնամաքրման գործընթացի շարունակությունն է:
