ՔՊ-ն կրկին դեմ է արտահայտվել տարածքային ամբողջականության դեմ հայտարարությունները քրեականացնելուն։ Այս մասին ԱԺ նիստում հայտարարեց «Քաղաքացիական պայմանագիր» խմբակցության պատգամավոր Վահագն Հովակիմյանը՝ Քրեական եւ Քրեադատավարական օրենսգրքում փոփոխություններ կատարելու մասին նախագծի քննարկման ժամանակ, որն ավելի վաղ ստացել էր ԱԺ պրոֆիլային հանձնաժողովի բացասական եզրակացությունը։

Նրա խոսքով՝ Հայաստանի Հանրապետության տարածքային ամբողջականությունը լիովին պաշտպանված է ցանկացած ոտնձգությունից։ «Այս խնդիրը լուծվել է մեր գործող օրենսդրությամբ՝ Քրեական օրենսգրքի շրջանակում։ Ավելին, առաջարկվող մոտեցումը կարող է առաջացնել կոնկրետ բարդություններ։ Այնպես որ, իրավական որոշակիության տեսակետից ձեր ներկայացրած օրինագիծը չի դիմանում որեւէ քննադատության»,- պարզաբանեց Հովակիմյանը։