նախընտրելի դարձնելՄայր աթոռ սուրբ Էջմիածնի հրատարակչական բաժինը մի շարք աշխատություններ է լույս ընծայել:
Մայր Աթոռը վերահրատարակել է Ներսես արքեպիսկոպոս Մելիք-Թանգյանի «Հայոց եկեղեցական իրավունք» աշխատությունը, որն առայժմ միակ հրատարակված գործն է հայկական կանոնագիտական գրականության մեջ եւ նախատեսված է Հայոց Եկեղեցու բարձրագույն ուսումնական հաստատություններում դասավանդման համար:
Լույս է տեսել Ս. Ներսես Շնորհալիի Նամականին (Հայ-բյուզանդական եկեղեցական բանակցություններ): Նամականին գրաբարից թարգմանել է Սեդա Ստամբոլցյանը: Ներկա միջնադարյան նամականին` կազմված երկու մասից, ներկայացնում է 12-րդ դարի այն ժամանակաշրջանը, որում գործել են հայոց կաթողիկոսներ Գրիգորիս Գ-ը, Ս. Ներսես Շնորհալին եւ Գրիգորիս Դ-ը:
Առաջին մասը, որի կազմողն ու նամակները նախաբանով ու ծանոթագրական պատմություններով ուղեկցողը Ներսես Լամբրոնացին է, բովանդակում է Հայ եւ Բյուզանդական Եկեղեցիների միջեւ 1165-1178 թթ. շրջանում ձեռնարկված միության փորձին առնչվող վավերագրեր, իսկ երկրորդ մասը ներկայացնում է բացառապես ս. Ներսես Շնորհալու նամակները` գրված տարբեր անձանց ու այլեւայլ առիթներով:
Մայր Աթոռի տպարանը լույս է ընծայել նաեւ Մայր Աթոռի Դիվանատան աշխատակից Տ. Ադամ քահանա Մակարյանի «Քրիստոնեության իսկությունը. գիտելիքներ հավատացյալներին» գիրքը:
Աշխատության մեջ մատչելի ձեւով տրվում են աստվածաբանական եւ եկեղեցագիտական համառոտ գիտելիքներ, որոնց հաջորդում են կյանքի տարբեր ոլորտներին առնչվող եւ հոգեւորի հետ կապ ունեցող իրողությունների բացատրություններ եւ ուսուցումներ` աստվածաշնչյան մեջբերումներով, Սուրբ Հայրերի գրվածքներից, Եկեղեցու պատմությունից քաղված տեղեկություններով:
Հեղինակն առանձին բաժին է նվիրել աղանդավորական ուսմունքներին ու դրանց հերքմանը, տրված են նաեւ հորդորակներ, որոնց նպատակն ընթերցողին հավատքի ու աստվածսիրության մեջ ամրապնդելն է:
