ԱՄՆ-ի տնտեսությունն առաջին եռամսյակում երկու տարի առաջ սկսված համավարակի անկումից հետո առաջին անգամ տարեկան կտրվածքով 1,4 տոկոսով կրճատվել է, սակայն սպառողները եւ ձեռնարկությունները շարունակել են գումարներ ծախսել, ինչը տնտեսության կայունության մասին է վկայում, հաղորդում է AP-ն:

Հունվար-մարտին ընդհանուր տնտեսական անկումը չի նշանակում, որ առաջիկա ամիսներին ռեցեսիայի հավանականություն կա: Տնտեսագետների մեծամասնությունը սպասում է, որ այս եռամսյակում տնտեսությունը կաշխուժանա, քանի որ զբաղվածության աճը եւ ավելի բարձր աշխատավարձերը նպաստում են աճին:

Ընդհակառակը, տնային տնտեսությունների եւ ընկերությունների կողմից մեծ ծախսերը ցույց են տալիս, որ տնտեսությունը, ամենայն հավանականությամբ, կշարունակի աճել այս տարի, նույնիսկ այն դեպքում, երբ Դաշնային պահուստային համակարգը նախատեսում է ակտիվորեն բարձրացնել տոկոսադրույքները՝ ինֆլյացիոն բռնկման դեմ պայքարելու համար: Առաջին եռամսյակը դժվար էր՝ հիմնականում խանութներում պահեստների համալրման տեմպերի դանդաղման եւ արտահանման կտրուկ անկման պատճառով։

Հինգշաբթի օրը ԱՄՆ առեւտրի նախարարությունը հրապարակել էր առաջին եռամսյակի ՀՆԱ-ի՝ երկրի ապրանքների եւ ծառայությունների արտադրանքի ընդհանուր ծավալի գնահատականը, որը զգալիորեն ցածր է 2021 թվականի չորրորդ եռամսյակի 6,9 տոկոս տարեկան աճից: Ընդհանուր առմամբ, 2021 թվականին տնտեսությունն աճել է 5,7 տոկոսով, ինչը 1984 թվականից օրացուցային տարվա ամենաբարձր ցուցանիշն է։