Եվրամիությունը ջանքեր է գործադրում, որպեսզի Բուլղարիային եւ Հյուսիսային Մակեդոնիային համոզի դադարեցնել իրենց վեճը եւ ճանապարհ բացել ԵՄ-ին երկու երկրների անդամակցության բանակցությունների համար, հինգշաբթի ասել է ԵՄ ընդլայնման հարցերով հանձնակատար Օլիվեր Վարհելին, հաղորդում է AP-ն։

Վարհելին հինգշաբթի օրը այցելել է Ալբանիայի մայրաքաղաք Տիրանա՝ հարեւան Հյուսիսային Մակեդոնիա եւ Բուլղարիա կատարած այցերից հետո: Նա ասել է, որ Տիրանայի եւ Սկոպյեի կառավարությունների հետ ԵՄ անդամակցության բանակցություններ սկսելու Բրյուսելի ձգձգումը սպառնալիքի տակ է դնում անվտանգությունն ու վստահությունը։

Բուլղարիան, որը 2007 թվականին է ԵՄ անդամ դարձել, արգելափակել է այս բանակցությունների մեկնարկը՝ պնդելով, որ Հյուսիսային Մակեդոնիան չի հարգել երկու հարեւան երկրների միջեւ 2017 թվականի բարեկամության պայմանագրի մասերը:

Բուլղարիան ցանկանում է, որ Հյուսիսային Մակեդոնիան ճանաչի էթնիկ բուլղարական փոքրամասնությանը իր սահմանադրության մեջ, սակայն վիճարկում է Բուլղարիայում մակեդոնական փոքրամասնության գոյության փաստը։

«ԵՄ-ի անվտանգությունը սպառնալիքի տակ է, ուստի մենք պետք է դա անենք (սկսենք բանակցությունները) հիմա, եւ մեր վստահությունը կասկածի տակ է դրվում»,- ասել է Վարհելին Ալբանիայի վարչապետ Էդի Ռամայի հետ մամուլի ասուլիսում։

ԵՄ առաջնորդները 2020 թվականին կանաչ լույս են տվել Ալբանիայի եւ Հյուսիսային Մակեդոնիայի անդամակցության բանակցություններ սկսելու համար, թեեւ ժամկետ չի որոշվել։ Քանի որ երկու երկրների հայտերը փոխկապակցված են, եւ անդամակցության բանակցությունները սկսելու համար պահանջում է ԵՄ միաձայն հավանություն, Բուլղարիայի վետոն թույլ չի տվել երկու երկրներին առաջ շարժվել:

ԵՄ անդամակցությունը դիտվում է որպես անկայուն Բալկաններում ժողովրդավարական, քաղաքական եւ տնտեսական բարեփոխումների խթան:

Արեւմտյան Բալկանների վեց երկրները՝ Ալբանիան, Բոսնիան, Կոսովոն, Չեռնոգորիան, Հյուսիսային Մակեդոնիան եւ Սերբիան, ԵՄ-ին միանալու իրենց ճանապարհի տարբեր փուլերում են գտնվում։