նախընտրելի դարձնելԱՄՆ նախագահի հանրապետական թեկնածու Միշել Բաքմանը օգոստոսի 13-ին հաղթել է Այովայի Էյմս քաղաքում անցկացված նախնական փրայմերիզներում` լրջորեն շրջանցելով մյուս թեկնածուներին:
Մինեսոտայից ընտրված կին կոնգրեսականի օգտին քվեարկել են հարցվածների 28,5 տոկոսը, երկրորդ տեղը զբաղեցրել է կոնգրեսական Ռոն Փոլը, իսկ երրորդ տեղում եղել է Թիմ Փոլենթին:
Վերջինս հրաժարվել է հետագա պայքարից: Բաքմանը հաղթել է մյուս հանրապետական թեկնածուներին, բացառությամբ մյուս երկու հիմնական ֆավորիտների` Միթ Ռոմնիի եւ Տեխասի նահանգապետ Ռիք Փերիի, որոնց անունն այս անգամ ընդգրկված չի եղել հարցաթերթիկների մեջ: Վերլուծաբանների կարծիքով, հենց վերջին երկուսի եւ Բաքմանի միջեւ էլ ընթանալու է հիմնական պայքարը: Առաջին գլխավոր փրայմերիզը կայանալու է 2012թ. փետրվարին:
Նշենք, որ Միշել Բաքմանը ԱՄՆ Կոնգրեսի ներկայացուցիչների պալատում բազմիցս աջակցություն է հայտնել Հայոց ցեղասպանությունը ճանաչող բանաձեւերին:
2006 թվականից ի վեր՝ ԱՄՆ Ներկայացուցիչների պալատում ընտրվելուց հետո, մասնավորապես, Միշել Բաքմանը դարձել է Հայոց ցեղասպանությունը ճանաչող բանաձեւերից մեկի համահեղինակը, որը կոչ է անում ԱՄՆ նախագահին իր ամենամյա ուղերձներում «որպես ցեղասպանություն բնորոշել 1.5 միլիոն հայերի սպանդը» եւ հիշատակել այդ ցեղասպանությանը ընդդիմանալու ԱՄՆ փորձերը:
«Ազատություն» ռադիոկայանի փոխանցմամբ, 2009 թվականին Բաքմանը նաեւ համաձայնություն է հայտնել փաստաթղթին, որը կոչ է անում ԱՄՆ նախագահին Հայոց ցեղասպանության ճանաչումը դարձնել պաշտոնական քաղաքականություն եւ երաշխավորել այս հարցի նկատմամբ համարժեք վերաբերմունքն ու դիրքորոշումը ԱՄՆ արտաքին քաղաքականության բնագավառում:
ԱՄՆ նախագահական ընտրությունները կայանալու են 2012թ. նոյեմբերին։
