Ակնկալվում է, որ ԱՄՆ-ը Ուկրաինա կուղարկի ռումբերի հավաքածուներ, որոնք գոյություն ունեցող չկառավարվող զինամթերքը կամ «բութ» ռումբերը կվերածեն բարձր ճշգրտության «խելացի» ռումբերի, որոնք հայտնի են որպես Joint Direct Attack Munitions կամ JDAMs, հաղորդում է CNN-ը՝ վկայակոչելով մի քանի ամերիկացի պաշտոնյաների:

Հավաքածուները «բութ» զինամթերքին ավելացնում են լողակներ եւ ճշգրիտ ուղղորդման համակարգ: Ակնկալվում է, որ դրանք կներառվեն Ուկրաինայի անվտանգության աջակցության հաջորդ փաթեթում արդեն այս շաբաթ, հայտնել են աղբյուրները։

Բարձր ճշգրտության ռումբերը կարող են օգնել Ուկրաինային հարձակվել ռուսական անշարժ պաշտպանական գծերի կամ այլ խոշոր օբյեկտների վրա: Բայց դրանք պետք է նետել կործանիչներից, ինչը մնում է լուրջ խնդիր՝ կապված Ռուսաստանի սեփական ՀՕՊ համակարգերի հետ:

Ուկրաինացի զինվորականները նաեւ պետք է խորհրդային ժամանակների ինքնաթիռներից JDAM-ը թիրախավորելու եւ արձակելու ճանապարհ գտնեն, ինչպես դա արել են այս տարվա սկզբին ամերիկյան արտադրության HARM հակառադարային հրթիռների դեպքում: Ուկրաինայի ռազմաօդային ուժերը ՄիԳ-29 կործանիչները հարմարեցրել են HARM հրթիռներ արձակելու համար։ Նրանք ստիպված կլինեն նույնը անել JDAM-ի համար:

ԱՄՆ-ը լայնորեն օգտագործել է JDAM-ը Իրաքում եւ Աֆղանստանում: Boeing-ի արտադրողի խոսքով՝ հավաքածուներն արտահանվել են ավելի քան երկու տասնյակ այլ երկրներ: Մինչ օրս արտադրվել է ավելի քան 400 000 հավաքածու՝ յուրաքանչյուրը մոտ 22 000 դոլար արժողությամբ:

Ըստ Boeing-ի, հավաքածուները ապահովում են ռումբերի գործողության մոտ 15 մղոն շառավիղը:

Ակնկալվում է, որ Ուկրաինային օգնության հաջորդ փաթեթը կներառի Patriot հակաօդային պաշտպանության համակարգերը։

Պաշտոնյաներից մեկի խոսքով, JDAM-երը էսկալացիայի մեծ վտանգ չեն կրում՝ իրենց համեմատաբար կարճ հեռահարության պատճառով, ինչպես ԱՄՆ-ի կողմից տրամադրված այլ զենքերը: Հավաքածուները թույլ չեն տա Ուկրաինային հարվածներ հասցնել Ռուսաստանի տարածքի խորքերը։