Հնարավոր չէ զմռսել սահմանը 100 տոկոսով, որ ներթափանցում չլինի։ Այս մասին NEWS.am-ի հետ զրույցում ասաց Ազգային անվտանգության ծառայության նախկին պետ Միքայել Համբարձումյանը։
Այդուհանդերձ, Միքայել Համբարձումյանի խոսքով, այդ գործընթացը հարյուր տոկոսով հնարավոր չէ իրականացնել, եւ պետք է գնահատել, թե սահմանահատումն ինչ հանգամանքներում է տեղի ունեցել, ծառայության կարգն արդյոք խախտվե՞լ է, թե՝ ոչ. «Այս դեպքով եւս քրեական գործ կհարուցվի եւ կքննվեն այն պաշտոնյաների գործողությունները, որոնք պատասխանատու են եղել ներթափանցման համար: Որոնողական աշխատանքները սահմանահատումից հետո ճիշտ են կազմակերպվել, թե՝ ոչ, դժվարանում եմ գնահատել, քանի որ ծանոթ չեմ կատարված աշխատանքին։ Սակայն փաստ է, որ իրավապահներին չի հաջողվել գտնել սահմանախախտին, ինչն արել են զգոն քաղաքացիները»,– ասաց նա։
Համբարձումյանը նշեց, որ անհնար է  իսպառ  բացառել նման դեպքերը. «Գիտեք, որ հայ-թուրքական, հայ-իրանական սահմանը պահվում է լուրջ ինժեներական կառույցներով. բայց էլի դեպքեր էին լինում, սահմանախախտները խախտում էին, կարողանում էին թիկունք ներխուժել, ու էլի նրանց բռնել են քաղաքացիները ու հանձնել իրավապահներին, այսինքն՝ ինչքան էլ սահմանը փակ լինի, նման դեպքեր լինում են: Ու ես իմ պրակտիկայից էլ մտաբերում եմ դեռ ԱԱԾ քննչականում աշխատելու ժամանակ, որ նման դեպքեր լինում էին, սահմանից 10-20 կմ առաջ են եկել, ու քաղաքացին է նկատել, ահազանգել»։
Միքայել Համբարձումյանը հիշեցրեց, որ նույնիսկ ԽՍՀՄ-ի շրջանում Իրանի եւ Թուրքիայի հետ սահմանամերձ գոտիներում բնակվող մարդկանց հրահանգավորում էին, որպեսզի ուշադիր լինեն սահմանախախտման դեպքերին. «Այսինքն, եթե նկատեին օտար մարդկանց, պետք է անմիջապես իրազեկեին իրավապահ մարմիններին՝ սահմանապահ ծառայության աշխատակիցներին: Դա լավ է, որ բնակիչներն աչալուրջ են, կարողանում են բացահայտել ու բռնել: Իհարկե, շատ ավելի լավ կլիներ, եթե իրավապահ մարմինները դա անեին, կանխեին, չթողնեին, որ ադրբեջանցիները խորանան թիկունք,  բայց ամեն դեպքում դա լավ պրոցես է, որ բնակիչները ուշադիր են եղել, բացահայտել, բռնել են»։