Առողջապահության համաշխարհային կազմակերպությունը (ԱՀԿ) հայտարարել է, որ Սուդանում շարունակվող հակամարտությունների ժամանակ առգրավված լաբորատորիայում կա «բիովտանգի բարձր ռիսկ», հայտնում է BBC:

Պաշտոնյաները հայտարարել են, որ դեռ պարզ չէ, թե ով է կանգնած մայրաքաղաք Խարթումում գտնվող Հանրային առողջության ազգային լաբորատորիայի գրավման հետևում:

Քաղաքը դատարկված է բանակի և արագ արձագանքման ուժերի միջև մարտերի պատճառով:

ԱՀԿ-ն երեքշաբթի օրը BBC-ին հայտնել էր, որ աշխատողներն այլևս չեն կարող լաբորատորիա մտնել:

Կազմակերպությունը նաև զգուշացրել է, որ հոսանքազրկումները թույլ չեն տալիս լաբորատորիայում նյութերը պատշաճ կերպով կառավարել:

ԱՀԿ-ի պաշտոնյաները հայտնել են, որ լաբորատորիայում առկա է կենսաբանական և քիմիական նյութերի լայն տեսականի: Այստեղ պահվում են կարմրուկի և խոլերայի հարուցիչներ, ինչպես նաև այլ վտանգավոր նյութեր։

Էլեկտրաէներգիայի բացակայությունը նաև վտանգի տակ է դնում լաբորատորիայում պահվող արյան պարկերի պակասող պաշարը:

Լաբորատորիան գտնվում է Խարթումի կենտրոնից ոչ հեռու և քաղաքի գլխավոր օդանավակայանին մոտ։

Այն մոտ է այն տարածքին, որտեղ գտնվում է Սուդանի ռազմական շտաբը և որտեղ բազմաթիվ մարտեր են ընթանում։