ԱՄՆ նախագահ Ջո Բայդենը Հիրոսիմայում Ճապոնիայի վարչապետ Ֆումիո Կիսիդայի հետ հանդիպման ժամանակ վերահաստատել է Վաշինգտոնի հանձնառությունը պաշտպանելու Ճապոնիան բոլոր միջոցներով, այդ թվում՝ միջուկային զենքով։ Այս մասին հինգշաբթի օրը հայտարարել է Ճապոնիայի ԱԳՆ-ն։

«Նախագահ Բայդենը վերահաստատել է ԱՄՆ-ի հանձնառությունը Ճապոնիայի պաշտպանությանը՝ փոխադարձ համագործակցության և անվտանգության պայմանագրին համապատասխան՝ ապահովված ողջ հնարավորություններով, այդ թվում՝ միջուկային»,- ասվում է հայտարարության մեջ։ Երկու ղեկավարները նաև բարձր են գնահատել ընդլայնված զսպման վերաբերյալ երկկողմ խորհրդակցությունների շրջանակներում քննարկումները, որոնք, ի թիվս այլ հարցերի, անցկացվում են արտաքին քաղաքականության և պաշտպանության գերատեսչությունների ղեկավարների՝ «երկու գումարած երկու» ձևաչափով հանդիպումների շրջանակներում։

Բացի այդ, նրանք քննարկել են տարածաշրջանային անվտանգության մի շարք հարցեր՝ նշելով, որ հնդխաղաղօվկիանոսյան տարածաշրջանում, հատկապես Արևելյան Ասիայում, ստատուս քվոն ուժով փոխելու ցանկացած միակողմանի փորձ անընդունելի է։

Այսպիսով, նրանք պայմանավորվել են համագործակցել «Չինաստանի հետ կապված խնդիրների լուծման գործում»՝ միաժամանակ նշելով «ընդհանուր մարտահրավերների շուրջ Չինաստանի հետ համագործակցության կարևորությունը»։ Միաժամանակ, Քիշիդան և Բայդենը ընդգծել են Թայվանի նեղուցում խաղաղության և կայունության կարևորությունը՝ կոչ անելով խաղաղ ճանապարհով լուծել հարակից խնդիրները։ Ճապոնիայի և ԱՄՆ-ի ղեկավարները նաև պայմանավորվել են սերտորեն համագործակցել ինչպես երկկողմ, այնպես էլ եռակողմ ձևաչափերով՝ Հարավային Կորեայի մասնակցությամբ։