Ֆլորիդայի նահանգապետ Ռոն Դեսանտիսը պաշտոնապես ներկայացրել է իր թեկնածությունը Հանրապետական ​​կուսակցությունից նախագահի թեկնածուի առաջադրման պայքարին մասնակցելու համար, չորեքշաբթի հաղորդում է Associated Press-ը։

Դեսանտիսի որոշման մասին հայտնի է դարձել այն բանից հետո, երբ նա դիմում է ներկայացրել ԱՄՆ Դաշնային ընտրական հանձնաժողով։ Սպասվում է, որ հինգշբաթի նա առցանց զրույց կունենա գործարար Իլոն Մասկի հետ եւ հրապարակավ կհայտարարի նախագահի պաշտոնում առաջադրվելու իր մտադրության մասին:

44-ամյա Դեսանտիսը 2019 թվականից Ֆլորիդայի նահանգապետ է։ Մինչ այդ՝ 2013-2018 թվականներին նա այս նահանգից եղել է ԱՄՆ Ներկայացուցիչների պալատի անդամ։ Նա համարվում է ԱՄՆ նախկին նախագահ Դոնալդ Թրամփի ամենալուրջ մրցակիցը հանրապետական ​​մյուս թեկնածուների շրջանում։

Հանրապետականների կողմից նախագահի թեկնածու առաջադրվելու մասին արդեն մի քանի հոգի հայտարարել են, այդ թվում՝ Թրամփը, Հարավային Կարոլինա նահանգից հանրապետական ​​սենատոր Թիմ Սքոթը, ՄԱԿ-ում ԱՄՆ նախկին դեսպան Նիկի Հեյլին, Արկանզասի նախկին նահանգապետ Ասա Հաթչինսոնը եւ գործարարներ Վիվեկ Ռամասվամին, Փերի Ջոնսոնը, ինչպես նաեւ ռադիոհաղորդավար Լարի Էլդերը:

Ավելի վաղ, մեկնաբանելով մրցարշավին մասնակցելու Սքոթի մտադրությունը, Թրամփն այն անվանել էր «Մեծ քայլ առաջ», ի տարբերություն Դեսանտիսի։ Հենց Դեսանտիսին են անվանում Թրամփի համար գլխավոր հանրապետական մրցակից։

Դեմոկրատական ​​կուսակցությունից մինչ այժմ նախագահական փրայմերիզներին մասնակցելու համար իրենց թեկնածությունն առաջադրել են ԱՄՆ ներկայիս նախագահ 80-ամյա Ջո Բայդենը, ԱՄՆ 35-րդ նախագահ Ջոն Քենեդիի զարմիկ Ռոբերտ Քենեդի կրտսերը եւ գրող Մարիաննա Ուիլյամսոնը։

Դեսանտիսը մեծ ժողովրդականություն է վայելում, եւ ըստ բազմաթիվ հարցումների արդյունքների՝ հանրապետականների համակիրների շրջանում որպես ընտրությունների թեկնածու նա առաջատար է։ Նա Յելի եւ Հարվարդի համալսարանների շրջանավարտ է, կրթությամբ՝ իրավաբան։