նախընտրելի դարձնել
Պակիստանի դատարանը երեքշաբթի օրը անօրինական է ճանաչել նախկին վարչապետ Իմրան Խանի՝պետական գաղտնիքներ հրապարակելու մեղադրանքով բանտային դատավարությունը, ասել է նրա փաստաբանը, հայտնում է AP-ն։
Փաստաբան Նաիմ Հայդեր Փանջութի խոսքով՝ Իսլամաբադի բարձրագույն դատարանի որոշումը կայացվել է Խանի միջնորդության հիման վրա։
Հայտնի չէ, թե արդյոք կառավարությունը կբողոքարկի այդ որոշումը։ Իշխանությունները պնդում էին, որպեսզի Խանին դատեն Ռավալպինդի կայազորային քաղաքի բանտում՝ նրա կյանքին սպառնացող վտանգի պատճառով։
Դատարանի որոշումը կայացվել է մոտ մեկ ամիս այն բանից հետո, երբ Խանին մեղադրանք է առաջադրվել պետական գաղտնիքներ հրապարակելու համար, ինչը, ըստ իրավաբանների, կարող է մահապատժի հանգեցնել:
Գործով մեղադրյալներից է Խանի մերձավոր օգնական Շահ Մահմուդ Քուրեշին, ով Պակիստանի «Թեհրիք-է-Ինսաֆ» կուսակցությունից պատգամավոր էր։ Ադիալայի բանտում դատավարության ընթացքում երկու մեղադրյալներն էլ հերքել են իրենց առաջադրված մեղադրանքները։
Խանի դեմ գործը բխում է 2022 թվականին խորհրդարանի անվստահության քվեով իշխանությունից նրա հեռացմանը հաջորդած հանրահավաքում նրա ելույթից և գաղտնի դիվանագիտական նամակի թափահարումից։
Փաստաթուղթը, որը ստացել է The Cipher անվանումը, չի հրապարակվել կառավարության կամ Խանի փաստաբանների կողմից, բայց կարծես՝ դիվանագիտական նամակագրություն է Վաշինգտոնում Պակիստանի դեսպանի և արտաքին գործերի նախարարության միջև:
Խանը պնդեց, որ դա ապացույց էր, որ իր հեռացումն ԱՄՆ-ի դավադրություն էր, որն, իբր, իրականացվել էր զինվորականների և նրա քաղաքական հակառակորդների, այդ թվում՝ իր իրավահաջորդ Շեհբազ Շարիֆի կողմից: Վաշինգտոնը, Պակիստանի զինվորականները և Շարիֆը հերքել են այդ պնդումը:
Խանը հանրության առջև չի երևացել օգոստոսից, երբ նա կոռուպցիայի համար երեք տարվա ազատազրկման էր դատապարտվել։ Իսլամաբադի բարձրագույն դատարանը հետագայում չեղյալ է համարել դատավճիռը:
