ՆախընտրելիՀայաստանի 2012թ. պետբյուջեի մասին օրենքի նախագիծը նախատեսում է սոցիալական փաթեթի ներդրում, ինչը նախկինում երբեք չի արվել եւ ինչն այս բյուջեն առանձնացնում է նախորդներից: Այս մասին NEWS.am-ի թղթակցին ասաց ԱԺ ֆինանսաբյուջետային հարցերի մշտական հանձնաժողովի նախագահ, կառավարող ՀՀԿ խմբակցության անդամ Գագիկ Մինասյանը: Նրա խոսքով` սոցիալական փաթեթի գաղափարը մի շարք առավելություններ ունի աշխատավարձի պարզ բարձրացման համեմատ:
«Այստեղ երկու ասպեկտ կա. առաջինը` եթե աշխատավարձերն ավելանային տոկոսային հարաբերակցությամբ, ապա դա կհանգեցներ նրան, որ բարձր աշխատավարձ ստացողներն ավելի մեծ հավելավճար կունենային, քան ցածր աշխատավարձ ստացողները, իսկ դա արդարացված չէ: Երկրորդը, եթե աշխատավարձը բարձրացվեր ֆիքսված չափով, կբարձրանային նաեւ հարկերը, իսկ սոցիալական փաթեթի դեպքում նման բան տեղի չի ունենում»,-նշեց պատգամավորը:
Գ. Մինասյանը նաեւ նշեց, որ բյուջեի նախագիծը նախատեսում է նաեւ կենսաթոշակների եւ նպաստների 10% բարձրացում, այն դեպքում, երբ գնաճը կանխատեսվում է 4%-ով: «Տվյալ պարագայում կարելի է խոսել ամենախոցելի խմբերի եկամուտների փաստացի ավելացման մասին», -նշեց նա:
