նախընտրելի դարձնելԲահրեյնի մայրաքաղաք Մանամայում եւ նրա մերձակայքում, նոյեմբերի 18-ին, բողոքի զանգվածային ցույցեր են անցկացվել, որոնք շարունակվել են նաեւ գիշերը: Ցույցերն ուղեկցվել են ոստիկանության հետ բախումներով. ակցիայի մասնակիցները նրանց վրա քարեր եւ շշեր են նետել, իսկ ոստիկանները կիրառել են ռետինե գնադակներ եւ արցունքաբեր գազ:
«Ալ Ջազիրա» հեռուստաալիքը փոխանցում է, որ ոստիկանները ձերբակալել են 14 մարդու, որոնցից ազատ է արձակվել միայն մեկը: Զոհվածների եւ տուժածների մասին տեղեկություններ չեն հաղորդվում:
Ցուցարարները պահանջում են երկրում քաղաքական բարեփոխումների անցկացում, հետապնդումների դադարեցում, քաղբանտարկյալների ազատ արձակում, իրական պայքար կոռուպցիայի դեմ եւ վարաչպետ Խալիֆ բեն Սալմանի հրաժարականը, ով արդեն 42 տարի այդ պաշտոնին է:
Հիշեցնենք, որ Բահրեյնում զանգվածային բողոքի ակցիաներն սկսվել էին այս տարվա փետրվարի կեսերին, որոնց մասնակցում էին բնակչության 75%-ը կազմող շիա-մահմեդականներին ներկայացնող ընդդիմադիր ուժերը:
Ընդդիմության ելույթները սակայն ճնշվեցին մարտին` Ծոցի արաբական երկրների համագործակցության խորհրդի կողմից ուղարկված ռազմական կոնտինգենտի միջոցով, սակայն սեպտեմբերին երկրում բողոքի նոր ալիք էր բարձրացել:
