ՆախընտրելիՄոսկվայում անցկացվում է Եվրասիական տնտեսական միության (Եվրազէս)-ի գագաթաժողովը, որին մասնակցում է նաեւ Հայաստանի նախագահ Սերժ Սարգսյանը: Հայաստանը այդ կազմակերպության մեջ հանդես է գալիս որպես դիտորդ:
Գագաթաժողովի օրակարգում 17 հարց է դրված: Եվրազեսի հինգ պետությունների` Ռուսաստանի, Բելառուսիայի, Ղազախստանի, Տաջիկստանի եւ Ղըրղզստանի ղեկավարները մի շարք որոշումներ կստորագրեն` Եվրազեսի դատարանի գործունեության հիմնական ոլորտների առնչությամբ: Կստորագրվի նաեւ Կոնվենցիա Եվրազեսի առաջնահերթությունների վերաբերյալ եւ կհաստատվի Եվրազեսի միջպետական նպատակային ծրագրերի իրականացման նոր կարգը:
Բացի այդ, նախագահները զեկույցներ կլսեն Եվրազեսի օժանդակ մարմինների աշխատանքների մասին: Սահմանային հարցերով խորհուրդը եւ Եվրազեսի անդամ-երկրների արդարադատության նախարարների խորհուրդը կքննարկեն կազմակերպության ֆինանսական հարցերի փաթեթը, օրինակ կընդունեն 2012-ի բյուջեն:
Հիշեցնենք, որ Եվրազեսի ներսում առկա «Եռյակը»` Ռուսաստանը, Բելառուսիան եւ Ղազախստանը, «առաջ է անցել» ընկերության մյուս անդամներից` ձեւավորելով Մաքսային միություն, իսկ այժմ անցում են կատարում Միասնական տնտեսական համագործակցության ձեւավորմանը:
Եվրասիական տնտեսական հանձնաժողովի կոլեգիայի նախագահ է նշանակվել Ռուսաստանի արդյունաբերության եւ առեւտրի նախարար Վիկտոր Խրիստենկոն:
