ՆախընտրելիՂազախստանի Ժանաոզեն քաղաքում անկարգություններին մասնակցելու համար 16 մարդ է ձերբակալվել: Այդ մասին դեկտեմբերի 24 –ին լրագրողներին ասել է շրջանային դատարանի ներկայացուցիչ Նուրսերիկ Շարիպովը:
Բացի այդ, ըստ նրա, վարչական պատասխանատվության կենթարկվեն անձինք, ովքեր չեն կատարել իրավապահների պահանջները, հաղորդում է «ՌԻԱ Նովոստին»:
Միաժամանակ` Ղազախստանի նախագահ Նուրսուլթան Նազարբաեւը, ով դեկտեմբերի 23-ին ժամանել էր Ժանաոզեն, հայտարարել էր, թե անկարգությունների մասնակիցներին հարձակման նախապես պատրաստել են` բաժանել են ձողեր, յուրաքանչյուրին վճարել են 20 հազարական տեգե:
«Անկարգությունների սադրիչների մի մասը ձերբակալվել են, սակայն նա, ով ղեկավարել է դա, ընդհանրապես Ժանաոզենում չի եղել: Մենք լրջորեն հետաքննելու ենք այդ գործը եւ յուրաքանչյուր մահվան դեպքը»,- ասել է Նազարբաեւը:
Հիշեցնենք, որ դեկտեմբերի 16-ին, Ղազախստանի անկախության 20-ամյակի տոնակատարությունների ժամանակ Ժանաոզենում տեղի էին ունեցել զանգվածային անկարգություններ, որի ժամանակ 15 մարդ էր զոհվել, մի քանի տասնակը վիրավորվել էր: Քաղաքում արտակարգ դրության ռեժիմ է մտցվել:
