նախընտրելի դարձնել
Իլոն Մասկը կարողացել է օգտագործել իր ղեկավարած կառավարության արդյունավետության վարչությունը (DOGE)՝ օգնելու Tesla-ին, SpaceX-ին եւ իրեն պատկանող այլ ընկերությունների խուսափել 2,37 մլրդ դոլար տուգանք վճարելուց: Այս մասին նշվել է ԱՄՆ Սենատի ներքին անվտանգության եւ կառավարական հարցերի կոմիտեի հետաքննությունների մշտական ենթակոմիտեի դեմոկրատ անդամների հրապարակված զեկույցում։
Փաստաթղթի հեղինակների խոսքով՝ մինչեւ 2025թ. հունվարի 20-ը՝ ԱՄՆ նախագահ Դոնալդ Թրամփի պաշտոնը ստանձնելու օրը, Մասկի ընկերությունները բախվել են առնվազն 65 դատական հայցի՝ ԱՄՆ առնվազն 11 դաշնային գործակալությունների հետ։ «Ենթակոմիտեի հետաքննությունն առաջին անգամ պարզել է, որ Մասկը եւ նրա ընկերությունները 2025թ. հունվարի դրությամբ բախվել են առնվազն 2,37 մլրդ դոլարի հնարավոր պարտավորությունների», - նշվել է զեկույցում:
Ինչպես հավաստիացնում են փաստաթղթի հեղինակները, այդ գումարը ներառում է Tesla-ի համար 1,19 մլրդ դոլարի պոտենցիալ տույժեր, որոնք կարող էին հաջորդել «Ավտոպիլոտի եւ լիովին ինքնավար վարման առանձնահատկությունների մասին ապակողմնորոշիչ հայտարարություններին»:
Բացի այդ, զեկույցում նշվել է նաեւ «Neuralink» սթարտափը, որը չիպեր է մշակում մարդու ուղեղում փոխպատվաստման համար. նրան սպառնում է մինչեւ 1,59 մլն դոլարի տուգանք՝ կապիկների եւ խոզերի վրա փորձեր կատարելիս կենդանիների բարեկեցության մասին օրենքների հնարավոր խախտման համար: Ընկերությունը կարող էր բախվել եւս 281 մլն դոլարի գանձման «սուտ կամ մոլորեցնող հայտարարությունների համար իր արտադրանքի հետ կապված ռիսկերի մասին»։
Փաստաթղթի հեղինակները նաեւ մատնանշել են շահերի բախումը. Մասկը վերահսկում է ԱՄՆ դաշնային կառավարական գործակալությունների աուդիտը եւ միաժամանակ հանդիսանում է այն ընկերությունների սեփականատերը, որոնք խոշոր պայմանագրեր են ստանում ԱՄՆ կառավարությունից: «Մասկի դիրքը թույլ է տալիս նրան խուսափել վերահսկողությունից, խափանել հետաքննությունը եւ չեղարկել դատավարությունը, եթե նա ցանկանա՝ իր պայմաններով եւ իր հրամանով»,- նշվել է զեկույցում:
