նախընտրելի դարձնել
Գերմանիայի արտգործնախարար Յոհան Վադեֆուլը հայտարարել է, թե չի տեսնում Ռուսաստանի հետ բանակցությունների որևէ առիթ՝ չնայած իշխող կոալիցիայի մաս կազմող Գերմանիայի սոցիալ-դեմոկրատական կուսակցության (SPD) անդամների «Մանիֆեստին», գրում է գերմանական Deutsche Welle պարբերականը։
«Այս պահին ես չեմ տեսնում ո՛չ առիթ, ո՛չ էլ հնարավորություն հետագա բանակցությունների համար», -պատասխանել է Վադեֆուլը լրագրողի հարցին, թե երբ է նա մտադիր հեռախոսազրույց ունենալ ՌԴ արտգործնախարար Սերգեյ Լավրովի հետ։
Ինչպես հաղորդում են լրատվամիջոցները, հարցը Ուեյմարյան եռանկյունու ընդլայնված համաժողովի (Weimar+) ժամանակ տրվել է Ուեյմարյան եռանկյունուն հինգշաբթի՝ հունիսի 12-ին։ Ձևաչափը միավորում է Գերմանիային, Ֆրանսիային և Լեհաստանին, ինչպես նաև Մեծ Բրիտանիային, Իտալիային, Իսպանիային և ԵՄ արտաքին գործերի և անվտանգության քաղաքականության հարցերով գերագույն հանձնակատար Քայա Կալլասին։
Եթե Մոսկվայի հետ նման բանակցություններ տեղի ունենան, Բեռլինը մտադիր է դրանք անցկացնել «եվրոպացի գործընկերների հետ համատեղ», սակայն այժմ «պետք է ընդունել, որ Ռուսաստանը պատրաստ չէ բանակցությունների, այլ ձգտում է պատերազմի», և քանի դեռ այդպես է, Գերմանիան «ամուր կկանգնի Ուկրաինայի կողքին», - պարզաբանել է Վադեֆուլը։
Նա միաժամանակ դեմ է արտահայտվել Ռուսաստանի նախագահ Վլադիմիր Պուտինի «հաշտեցման քաղաքականությանը», քանի որ «Ռուսաստանի վերջին հարձակումները Ուկրաինայի վրա ցույց տվեցին, որ Կրեմլը ներկայում պատրաստ չէ պատերազմի ավարտի շուրջ բանակցություններ վարել»։
«Ազատ Արևմուտքը չի կարող դա ընդունել», -հայտարարել է Յոհան Վադեֆուլը։
Ավելի վաղ Գերմանիայի ֆինանսների նախարարի պաշտոնը զբաղեցնող փոխկանցլեր Լարս Քլինգբայլը անհամաձայնություն էր հայտնել Գերմանիայի սոցիալ-դեմոկրատական կուսակցության (SPD) իր գործընկերների կոչի վերաբերյալ՝ Մոսկվայի հետ բանակցություններ սկսելու առնչությամբ։
«Ռուսական բանակը շարունակում է տառապանքներ պատճառել Ուկրաինային, և նրա գործողությունները ամեն օր հանգեցնում են մարդկանց մահվան», -Բեռլինում լրագրողներին հայտարարել է Քլինգբայլը։
Ռուսաստանի նախագահ Վլադիմիր Պուտինը կարող է անմիջապես դադարեցնել պատերազմը, «բայց նա դա չի անում», ուստի Բեռլինի ռազմական աջակցությունը Կիևին կշարունակվի, ընդգծել է փոխկանցլերը։
Միաժամանակ նա նշել է, որ ճիշտ է համարում խաղաղության ուղիների որոնումը, սակայն այդ հարցի լուծման վերաբերյալ այլ դիրքորոշում է որդեգրել։
