նախընտրելի դարձնելՀայաստանի սպորտի եւ երիտասարդության հարցերի նախարարության համակարգի 24 պետական ոչ առեւտրային կազմակերպությունների (ՊՈԱԿ) տնօրենները բաց նամակով են հանդես եկել, հայտարարելով, որ իրենք կապ չունեն այն բաց նամակի հետ, որը գրվել է նախարարության 18 ՊՈԱԿ-ների ղեկավարների կողմից: Այնտեղ խիստ քննադատություն կար Սպորտի նախարարի ու փոխնախարարի հասցեին:
Այժմ, 24 ՊՈԱԿ-ների տնօրենների բաց նամակում ասվում է.
«Օրեր առաջ Հայաստանի սպորտի եւ երիտասարդության հարցերի նախարարության համակարգի 18 ՊՈԱԿ-ների տնօրենների անունից որոշ լրատվամիջոցներում հայտնվել էր անստորագիր բաց նամակ` ուղղված ՀՀ նախագահին, ՀՀ վարչապետին եւ ՀԱՕԿ նախագահ Գագիկ Ծառուկյանին:
Այսօր մենք պաշտոնապես հայտարարում ենք, որ նախարարության համակարգում գործող ոչ մի ՊՈԱԿ-ի տնօրեն այդ նամակի հետ առնչություն չունի եւ ոչ մեկը նման փաստաթուղթ չի ստորագրել:
Մենք խստորեն դատապարտում ենք վաղուց ի վեր իր դարն ապրած նման էժանագին նեոբոլշեւիկյան գործելաոճը, որի նպատակը մարզաշխարհի ներկայացուցիչների մեջ պառակտում մտցնելու անառողջ ցանկությունն է միայն: Անստորագիր նամակներով հանդես եկողներին խորհուրդ ենք տալիս զուր ջանքեր չթափել եւ իրենց երիտասարդական ավյունն ու էներգիան ուղղել որեւէ հանրօգուտ գործ կատարելուն:
ՀՀ սպորտի եւ երիտասարդության հարցերի նախարարության եւ ՀԱՕԿ-ի ամենօրյա ուշադրության արդյունքում է, որ սպորտը մեր երկրում զարգացում է ապրում, աստիճանաբար լուծում են ստանում ոլորտում առկա բազմաթիվ խնդիրներ: ՀԱՕԿ նախագահ Գագիկ Ծառուկյանի հսկայական ներդրումների շնորհիվ ամբողջ հանրապետության տարածքում կառուցվում են նոր մարզադպրոցներ, խրախուսվում են բարձր արդյունքներ արձանագրած մարզիկները:
2012-ը օլիմպիական տարի է եւ ոչինչ չի կարող խանգարել մեզ աշխատել միասնական ու համերաշխ ընտանիքով եւ Լոնդոնում անպայման հասնել մեր ժողովրդի համար այդքան սպասված օլիմպիական բարձունքին:
Իսկ նման էժանագին նախաձեռնությունների հեղինակներին խորհուրդ ենք տալիս զուր ջանքեր ու եռանդ չթափել մարզաշխարհի ներկայացուցիչների միջեւ պառակտում մտցնելու համար, միեւնույնն է բոլոր փորձերը, ինչպես եւ այս մեկը` անհաջողության են մատնվելու»:
