Դիվանագիտական աղբյուրը շաբաթ օրը AFP գործակալությանը հայտնել է, որ ԱՄՆ-ն Ուկրաինային առաջարկել է անվտանգության երաշխիքներ, որոնք նման են ՆԱՏՕ-ի անդամ երկրների կողմից օգտագործվող երաշխիքներին, բայց տարբերվում են դրանցից։

Այս առաջարկը հնչել է շաբաթ օրն ավելի վաղ ԱՄՆ նախագահ Դոնալդ Թրամփի՝ Ուկրաինայի նախագահ Վլադիմիր Զելենսկու և եվրոպացի առաջնորդների հետ ունեցած հեռախոսազրույցի ժամանակ, հայտնել է աղբյուրը։

«Որպես Ուկրաինայի անվտանգության երաշխիքներից մեկը՝ ամերիկյան կողմն առաջարկել է ՆԱՏՕ-ի 5-րդ հոդվածով չնախատեսված տիպի երաշխիք, որը, ենթադրաբար, համաձայնեցված է (Ռուսաստանի առաջնորդ Վլադիմիր) Պուտինի հետ», - ասել է դիվանագիտական աղբյուրը։ ՆԱՏՕ-ի հավաքական անվտանգությունը հիմնված է 5-րդ հոդվածի սկզբունքի վրա. եթե ՆԱՏՕ-ի անդամներից մեկը հարձակման է ենթարկվում, ողջ հյուսիսատլանտյան դաշինքը ոտքի է կանգնում՝ նրան պաշտպանելու համար։

Թրամփը, Զելենսկին և եվրոպացի առաջնորդները, այդ թվում՝ ՆԱՏՕ-ի գլխավոր քարտուղար Մարկ Ռյուտեն, շաբաթ օրը վաղ առավոտյան զրույց են ունեցել՝ քննարկելու ուրբաթ օրը Ալյասկայում կայացած Թրամփի և Ռուսաստանի նախագահ Վլադիմիր Պուտինի գագաթնաժողովը։

Այդ համատեղ զանգից առաջ Թրամփը զրուցել է նաև Զելենսկու հետ՝ Ալյասկայից վերադառնալիս։

«Ամերիկյան կողմը (անվտանգության համատեղ երաշխիքների) այս առաջարկը հնչեցրել է նախագահ (Զելենսկու) հետ զրույցի ժամանակ, իսկ հետո կրկնել է այն եվրոպացիների հետ համատեղ զրույցի ընթացքում», - ասել է դիվանագիտական աղբյուրը։

Իրավիճակին ծանոթ մեկ այլ աղբյուր հաստատել է, որ քննարկվել են ՆԱՏՕ-ի երաշխիքներին նմանվող երաշխիքներ։

Սակայն այս աղբյուրն ավելացրել է. «Ոչ ոք չգիտի, թե ինչպես դա կարող է աշխատել, և ինչու է Պուտինը համաձայնել դրան, եթե նա կտրականապես դեմ է ՆԱՏՕ-ին և, ակնհայտորեն, դեմ է Ուկրաինայի ինքնիշխանության իսկապես արդյունավետ երաշխիքներին»։

Զելենսկին երկուշաբթի օրը պետք է ժամանի Վաշինգտոն՝ Թրամփի հետ բանակցությունների համար։ Երկրորդ աղբյուրը AFP-ին հայտնել է, որ Զելենսկին կքննարկի, թե ինչ ձևաչափով կկայանա Թրամփ-Պուտին-Զելենսկի հնարավոր գագաթնաժողովը, խաղաղ բանակցություններում Կիևի եվրոպացի դաշնակիցների դերը, տարածքները և անվտանգության երաշխիքները։