Հնդկաստանը բանակցություններ է վարում Միացյալ Նահանգների հետ երկկողմ առևտրային համաձայնագիր կնքելու շուրջ, երեքշաբթի օրը հայտարարել է Միության առևտրի և արդյունաբերության նախարար Պիյուշ Գոյալը՝ մի քանի օր անց այն բանից հետո, երբ Վաշինգտոնը կրկնապատկել է հնդկական ապրանքների մաքսատուրքերը՝ որպես Նյու Դելիի կողմից ռուսական նավթի շարունակական ներմուծման համար պատժիչ միջոց, հաղորդում է Hindustan Times-ը։

«Մենք երկխոսության մեջ ենք ԱՄՆ-ի հետ՝ ազատ առևտրի համաձայնագիր կնքելու համար», - ասել է Գոյալը՝ արդյունաբերական պալատի կայուն զարգացմանը նվիրված միջոցառման ժամանակ։

Հնդկաստանը և ԱՄՆ-ն գործարքի շուրջ բանակցություններ են վարում մարտից ի վեր և մինչ օրս ավարտել են բանակցությունների հինգ փուլ։

Օգոստոսի 27-ից 50 տոկոս մաքսատուրքի սահմանումից հետո, ԱՄՆ-ի պատվիրակությունը հետաձգել է Հնդկաստան կատարելիք այցը, որը նախատեսված է եղել օգոստոսի 25-ին՝ բանակցությունների հաջորդ փուլին մասնակցելու համար։

Բանակցությունների վեցերորդ փուլի նոր ամսաթվերը դեռևս չեն նշանակվել։