ՆախընտրելիՄԱԿ-ի Անվտանգության խորհրդում Ռուսաստանն ու Չինաստանը Սիրիայի վերաբերյալ կցուցաբերեն նույն` միակ ճշմարիտ դիրքորոշումը: Այդ մասին NEWS.am-ի թղթակցի հետ զրույցում ասաց Ռազմավարական հետազոտությունների ռուսաստանյան ինստիտուտի սեւծովյան-կասպյան կենտրոնի ղեկավար Էդուարդ Պոպովը: Նրա խոսքով` այս երկու պետությունները չեն նահանջի` չնայած ԱՄՆ-ի եւ Մեծ Բրիտանիայի կողմից ճնշմանը ԱԽ-ում, ինչպես նաեւ ԵՄ-ի ու Արաբական պետությունների լիգայի բարոյաքաղաքական ճնշմանը:
«Ներկայումս ՄԱԿ Անվտանգության խորհրդում պատային իրավիճակ է ստեղծվել, երբ մշտական անդամներից երեքը (ԱՄՆ, Մեծ Բրիտանիա, Ֆրանսիա) պնդում են Սիրիայի նկատմամբ «միլիտարիստական» դիրքորոշումը, իսկ երկուսը (Ռուսաստանն ու Չինաստանը) հետեւողականորեն պաշտպանում են ազգային պետությունների ինքնիշխանությունը: Ասպարեզում միայն Սիրիան չէ: Խոսքը ոչ ավել, ոչ պակաս, միջազգային հարաբերությունների համակարգում ազգային պետությունների ինստիտուտի վերացման եւ Մեծ Մերձավոր Արեւելքի այլ տարածաշրջաններ «արաբական հեղափոխությունների» հետագա արտահանման մասին է»,-նշեց Պոպովը` ընդգծելով, որ այդ «արտահանումը» հետագայում կարող է հասնել Հարավային Կովկասի երկրներ, ինչպես նաեւ Ռուսաստան:
Փորձագետը կարծում է, որ ՄԱԿ ԱԽ-ում միջազգային հիմնական նորմերը խախտող բանաձեւի անցկացումը չի հաջողվի:
