նախընտրելի դարձնել
Ավստրալիայի կառավարությունը որոշել է մասամբ օգտագործել վառելիքի ռազմավարական պաշարները՝ մեղմելու համար գլոբալ մատակարարումների խափանումների հետեւանքները՝ պայմանավորված Իրանի շուրջ պատերազմով, տեղեկացրել է երկրի էներգետիկայի նախարար Քրիս Բոուենը, փոխանցել է Reuters-ը։
Նրա խոսքով՝ կառավարությունը թույլ կտա բաց թողնել բենզինի եւ դիզելային վառելիքի որոշ պարտադիր պաշարներ՝ ներքին շուկան կայունացնելու եւ երկրի մի քանի շրջաններում վառելիքի պակասը նվազեցնելու համար։
Նախարարը նշել է, որ կառավարությունը ժամանակավորապես թույլատրել է օգտագործել վառելիքի նվազագույն պարտադիր պաշարների մինչեւ 20 տոկոսը, որը պարտավոր են պահել վառելիքային ընկերությունները։
Այս քայլը թույլ կտա շուկա դուրս բերել մինչեւ 762 միլիոն լիտր բենզին եւ դիզելային վառելիք։ Իշխանությունների կարծիքով՝ սա կօգնի աջակցել տրանսպորտի, գյուղատնտեսության եւ լոգիստիկ ընկերություններին, մասնավորապես Ավստրալիայի հեռավոր շրջաններում, որտեղ մատակարարման խափանումները առավել սուր են զգացվում։
Որոշումը կայացվել է ԱՄՆ-ի եւ Իրանի միջեւ հակամարտության բռնկմանը հաջորդած համաշխարհային էներգետիկ շուկաներում աճող լարվածության ֆոնին: Ռազմական գործողությունները եւ Պարսից ծոցում նավագնացության ուղիների խափանման սպառնալիքները մեծացրել են նավթի եւ նավթամթերքի մատակարարման կայունության մտահոգությունները: Ավստրալիայի համար, որը մեծապես կախված է ներմուծվող վառելիքից, միջազգային մատակարարման շղթաների ցանկացած խափանում կարող է արագ ազդել ներքին շուկայի վրա:
Կառավարությունում ընդգծել են, որ սա ժամանակավոր միջոց է, որը նպատակ ունի կանխել վառելիքի պակասը եւ գների կտրուկ աճը:
Նախարարի խոսքով՝ պաշարների մի մասի օգտագործումը կապահովի ավելի կայուն մատակարարումներ առաջիկա շաբաթներին, մինչ մատակարարները կհարմարվեն համաշխարհային շուկայի նոր իրավիճակին:
Իշխանությունները նաեւ կոչ են արել սպառողներին եւ բիզնեսին խուսափել վառելիքի խուճապային գնումներից՝ նշելով, որ երկիրն ունի զգալի պաշարներ: Կառավարությունը շարունակում է վերահսկել համաշխարհային էներգետիկ շուկան եւ պատրաստ է անհրաժեշտության դեպքում ձեռնարկել լրացուցիչ միջոցներ մատակարարումների կայունությունը պահպանելու համար:
