նախընտրելի դարձնել
Իսրայելը ԱՄՆ-ին հետախուզական տվյալներ է տրամադրել Հորմուզի նեղուցի և Պարսից ծոցի իրանական կղզիների, այդ թվում՝ Խարգ կղզու վերաբերյալ՝ տարածաշրջանում ամերիկյան ռազմական գործողության նախապատրաստման մասին հաղորդագրությունների ֆոնին, հաղորդում է The Times of Israel-ը՝ հղում անելով իսրայելական ռազմական աղբյուրներին։
Ինչպես հաղորդել է CNN-ը, անցյալ կիրակի Մերձավոր Արևելքում ԱՄՆ կենտրոնական հրամանատարության (CENTCOM) ղեկավար, ծովակալ Բրեդ Քուփերը չհայտարարված հանդիպում է անցկացրել Իսրայելի պաշտպանության ուժերի (IDF) շտաբի պետ, գեներալ-լեյտենանտ Էյալ Զամիրի և այլ բարձրաստիճան իսրայելցի գեներալների հետ։
Ըստ The New York Times-ի, Պենտագոնն արդեն մի քանի հարյուր հատուկ գործողությունների ուժեր է տեղակայել Մերձավոր Արևելք։ Թերթի աղբյուրները նշել են, որ այդ ստորաբաժանումները կմիանան տարածաշրջան ժամանած ծովային հետևակայիններին և դեսանտայիններին։
Թերթի աղբյուրները կարծում են, որ հատուկ նշանակության զորքերի զինվորները, ինչպես նաև դեսանտայինները և ծովային հետևակը կարող են տեղակայվել Հորմուզի նեղուցը պաշտպանելու համար, որը Իրանը փաստացի փակել է, կամ որպես Խարգ կղզու՝ Պարսից ծոցի հյուսիսում գտնվող Իրանի նավթային հանգույցի գրավման գործողության մաս: Ավելին, հատուկ նշանակության զորքերը կարող են օգտագործվել Սպահանում գտնվող Իրանի միջուկային օբյեկտից բարձր հարստացված ուրանը գրավելու համար:
