Ռուսաստանում հուլիսի 13-ի երեկոյան տեղի ունեցած ավիաղետից զոհված Տիգրան Ադամյանի դին այս գիշեր են տեղափոխել Հայաստան:
Ինչպես NEWS.am-ին հայտնեցին Գայի գյուղապետարանից, Տիգրան Աղամյանի հուղարկավորությունը տեղի կունենա հուլիսի 18-ին: Նրանց փոխանցմամբ՝ Տիգրանի դին տեղափոխել են փակ դագաղով:
Նշենք, որ 27-ամյա երիտասարդն ամուսնացած էր, երկու երեխա ուներ, մի քանի ամիս առաջ էր մեկնել Մոսկվա՝ աշխատելու նպատակով:
Ավելի վաղ NEWS.am-ը հայտնել էր, որ հուլիսի 13-ին ժամը 18.50-ի սահմաններում ՌԴ Ռյազանի մարզի Սպասսկի շրջանի Սպասսկ քաղաքից 4 կմ դեպի հյուսիս տեղի է ունեցել թեթեւ շարժիչով մարդատար ինքնաթիռի օդաղետ:
Ինքնաթիռի օդաչուն եղել է 1958 թվականին ծնված Էդուարդ Ռուստամյանը: Նրա ուղեւորներն են եղել Վալերի Բարանովը (ծնված 1968 թվականին), Կարեն Հարությունյանը (ծնված 1981 թվականին) եւ Հայաստանի քաղաքացի Տիգրան Ադամյանը (ծնված 1987թ.):
