Ռուսաստանաբնակ հայ գործարար, ծնունդով արցախցի Լեւոն Հայրապետյանին առաջադրված մեղադրանքները շինծու են, դրանց համար ոչ մի հիմք չկա, իսկ Ռուսաստանի Դաշնության օրենքը պահանջում է, որ նման հիվանդներին կալանքի տակ չեն պահում: Այս մասին NEWS.am-ին ասաց Լեւոն Հայրապետյանի ընկեր Արթուր Սաֆարյանը:
«Ինչպես եւ նախկինում Լեւոն Հայրապետյանի փաստաբանները համոզված են, որ առաջադրված մեղադրանքների համար ոչ մի հիմք չկա: Ի դեպ, այս հոդվածները նախատեսում են մինչեւ տասը տարվա ազատազրկում, բայց նրանք մոռանում են, որ ըստ ՌԴ օրենքի՝ նման հիվանդին չպետք է պահել կալանքի տակ: Հիմա փաստաբաններն այս ուղղությամբ աշխատում են, որ խափանման միջոց կալանքը փոխվի»,- ասաց նա:
Արթուր Սաֆարյանի խոսքով՝ արդեն հարցաքննվել է «Սիստեմա ԱՖԿ» ընկերության սեփականատերը, որը հերքել է բոլոր մեղադրանքները: Հարցին՝ արդյոք հայ բարերարն էլ է հարցաքննվել՝ ընկերը պատասխանեց. «Ես տեղյակ չեմ, բայց մեղադրանք ներկայացնելիս նաեւ ցուցմունք պետք է տալ: Այնպես որ կարծում եմ, որ տվել է»:
Նշենք, որ փաստաբան Ռուբեն Մարգարյանի փոխարեն այս պահին գորխով զբաղվում է Սամվել Կարախանյանը: Մոսկվայում են նաեւ Լեւոն Հայրապետյանի եղբայրն ու եղբոր որդին:
Հիշեցնենք, որ հուլիսի 24-ին Ռուսաստանի Դաշնության հետաքննչական կոմիտեն «Բաշնեֆտ» ընկերության բաժնետոմսերը հափշտակելու եւ անօրինական ճանապարհով ստացված գումարները յուրացնելու մեջ կասկածվող հայ գործարար Լեւոն Հայրապետյանին մեղադրանքներ է առաջադրել ՌԴ քրեական օրենսգրքի 160-րդ (յուրացում կամ վատնում) եւ 174-րդ (անօրինական ճանապարհով ձեռք բերված միջոցների լվացում) հոդվածներով:
