ԵԿՄ նախագահ, գեներալ-լեյտենանտ Մանվել Գրիգորյանը պարգեւատրել է խոցված հայկական ուղղաթիռի անձնակազմին տարհանած խմբին: Այս մասին NEWS.am-ի թղթակցի հետ զրույցում ասաց նրա օգնականը՝ Վարդան Վարդանյանը:

Մանվել Գրիգորյանը պարգեւատրել է ուղղաթիռի անձնակազմին տարհանած 7 հոգանոց խմբին, նրանցից միայն 2-ն էին ներկա արարողությանը, մյուս 5-ի պարգեւը գեներալը ուղարկել է Արցախ: Դրանից բացի՝ ԵԿՄ նախագահը պարգեւատրել է նաեւ ջոկատի հրամանատարին եւ Պաշտպանության բանակի հետախուզության պետին: Նրանց բոլորին տրվել է ԵԿՄ 20 տարի հոբելյանական մեդալով:

Հիշեցնենք, որ ԼՂՀ ՊՆ-ի փոխանցմամբ՝ ղարաբաղա-ադրբեջանական սահմանի արեւելյան հատվածի օդային տարածքում նոյեմբերի 12-ին, ժամը 13.45-ի սահմանում ուսումնավարժական թռիչքի ժամանակ ադրբեջանական ԶՈւ-ի կողմից հրադադարի ռեժիմի խախտման արդյունքում խոցվել էր ԼՂՀ ՌՕՈւ «Մի-24» ուղղաթիռը: Խոցման վայրը շփման գծին չափազանց մոտ էր: Հակառակորդը շարունակում էր տարբեր տրամաչափի հրաձգային զենքերից ինտենսիվ կրակ վարել դեպքի վայրի ուղղությամբ՝ թույլ չտալով մոտենալ ուղղաթիռի անկման վայրին: Ուղղաթիռի խոցումից տասն օր անց՝ նոյեմբերի 22-ին, ԼՂՀ զինված ուժերը հատուկ գործողություն իրականացրին, որի արդյունքում դուրս բերեցին եւ ընտանիքներին հանձնեցին Ազատ Սահակյանի դին, Սերգեյ Սահակյանի եւ Սարգիս Նազարյանի մասունքները։