Գյումրիում հունվարի 12-ին դաժանաբար սպանված Ավետիսյանների հարազատները կարող են դիմել ռուսական կողմին եւ ներգրավվել տուժողի իրավահաջորդներ, սակայն իրենք նման ցանկություն չունեն: Այս մասին այսօր՝ ապրիլի 2-ին, Գյումրիում հրավիրված քննարկման ժամանակ ասաց տուժողի իրավահաջորդի ներկայացուցիչ, փաստաբան Լուսինե Սահակյանը:
«Չենք ներգրավվում, որովհետեւ կարծում ենք՝ սա ապօրինի քրեական գործ է, եւ մենք այնտեղ անելիք չունենք: Ռուսական կողմը շատ կուրախանա, բայց մենք նման ցանկություն չունենք»,- ասաց փաստաբանը:
Տուժողի իավահաջորդի ներկայացուցիչ Երվանդ Վարոսյանի խոսքով էլ՝ սպանության դեպքի առթիվ ռուսական կողմը քրեական գործ չպետք է հարուցեր:
«Կարող էր քրեական գործ հարուցել դասալքության, բայց ոչ սպանության»,- ավելացրեց փաստաբանը:
Նշենք, որ Գյումրիի սպանդի գործով քրեական գործեր են հարուցվել եւ Հայաստանում, եւ Ռուսաստանում:
Հիշեցնենք, որ Ավետիսյանների ընտանիքի 6 անդամների սպանությունը տեղի է ունեցել 2015թ. հունվարի 12-ին։ Ավետիսյանների ընտանիքից ողջ էր մնացել 6 ամսական Սերյոժա Ավետիսյանը, որը ծանր վնասվածքներով տեղափոխվել էր բժշկական կենտրոն, ուր յոթ օր անց մահացել էր: Ավետիսյանների ընտանիքի 7 անդամի սպանության համար մեղադրվում է Գյումրիի 102-րդ ռուսական ռազմաբազայի ժամկետային զինծառայող Վալերի Պերմյակովը։ Մինչեւ օրս հարազատների համար անհայտ են սպանության պատճառները: Նրանց համար կասկածելի է նաեւ սպանության մեջ մեղադրվող անձը, արդյոք նա միայնակ է գործել եւ ինչպես է կարողացել միայնակ սպանել ընտանիքի 7 անդամներին:
