Ադրբեջանն ունի 11-12 զոհ, որոնց անունները ճշգրտված են ՊԲ կողմից, եւ մոտ նույնքան զոհ, որոնց անունները ճշգրտման փուլում են: Այս մասին այսօր՝ սեպտեմբերի 30-ին, ԼՂՀ Ազգային ժողովում հայտարարել է ԼՂՀ պաշտպանության նախարար Լեւոն Մնացականյանը:
Այս առնչությամբ, ԼՂՀ վարչապետի մամուլի խոսնակ Արտակ Բեգլարյանը ֆեյբուքյան իր էջում գրել է հետեւյալը.
«Քիչ առաջ ԱՀ պաշտպանության նախարար Լեւոն Մնացականյանը ԱԺ-ում, պատասխանելով իրեն ուղղված հարցին, նշել է, որ ՊԲ-ը վերահսկում է իրավիճակը եւ կատարում պատժիչ գործողություններ՝ ի պատասխան Ադրբեջանի ագրեսիայի: Արդյունքում Ադրբեջանն ունի 11-12 զոհ, որոնց անունները ճշգրտված են ՊԲ կողմից, եւ մոտ նույնքան զոհ, որոնց անունները ճշգրտման փուլում են: Բացի դրանից, իրենց հոսպիտալներում այս պահի դրությամբ 60-80 վիրավոր կա՝ ըստ Լեւոն Մնացականյանի»:
Բեգլարյանը նաեւ հաղորդել է իր տեղեկությունները, ըստ որոնց` «բացի մարդկային կորուստներից, ադրբեջանցիները կրել են նաեւ նյութական զգալի կորուստներ, քանի որ մի քանի հենակետեր եւ զորանոցներ են ոչնչացվել մեր կողմից՝ իրենց զինտեխնիկայով հանդերձ: Կարծում եմ՝ ակնհայտ է, որ Տավուշի բնակիչների եւ ԱՀ զինվորների վրա հարձակումները Բաքուն չի մարսել»:
