Սեւամորթ ամերիկացին ապրիլի 29-ին ազատ է արձակվել բանտից ամերիկյան Լուիզիանա նահանգում, որտեղ նա 41 տարի բանտում է անցկացրել մի դատավճռով, որը հետագայում հակասահմանադրական է ճանաչվել: Այս մասին հայտնել է Reuters գործակալությունը՝ վկայակոչելով 57-ամյա Հերի Թայլերի ու նրա ընտանիքի հայտարարությունը:
1974 –ին Թայլերին դատապարտել են մահապատժի 13-ամյա սպիտակամորթ տղա Թոմաս Ուեբերի սպանության համար: Սեւամորթ դեռահասը իր ընկերների հետ ավտոբուսով անցնում էր դպրոցականների՝ այդ թվում Ուեբերի կողքով, երբ հնչել է կրակոցը: Ավտոբուսում խուզարկության ժամանակ հայտնաբերվել է ատրճանակ: Ոստիկանությունը, հիմք ընդունելով միայն սպիտակամորթ տղաների ցուցմունքները, կալանավորել է Թայլերին, նրան մեղադրանք առաջադրելով սպանության մեջ, որի համար մահապատիժ էր նախատեսված: Գործը քննել է մի հանձնաժողով, որի կազմում միայն սպիտակամորթ ատենակալներ էին, որոնք աֆրոամերիկացուն միաձայն մեղավոր են ճանաչել: 1976-ին Թայլերի մահապատիժը փոխարինել են ցմահ ազատազրկումով: Այդ նույն տարին Լուիզիանայում ու երկրի մյուս նահանգներում չեղարկել են մահապատիժը: Գործով ականատեսները ավելի ուշ հրաժարվել են իրենց ցուցմունքներից, ինչը իշխանություններին թույլ է տվել եռակի կրճատել աֆրոամերիկացու ազատազրկման ժամկետը: Վերջապես ԱՄՆ հինգերորդ օկրուգի վճռաբեկ դատարանը, քննելով 1974-ի դատավարությունը, ատենակալների դատավճիռը հակասահմանադրական է ճանաչել: Դատարանը վճռել է, որ 16-ամյա դեռահասին անարդարացիորեն դատել են որպես չափահասի, ու բացի դրանից նրան զրկել անմեղության կանխավարկածի հնարավորությունից:
Սակայն Թայլերին կրկնակի դատավարության հնարավորություն չտվեցին: Նա ութ տարի անցկացրել է մենախցում, հետո նրան տեղափոխել են ընդհանուր ռեժիմի խուց: Արդարությունը հաղթանակել է միայն Լուիզիանայում անչափահաս հանցագործների համար ցմահ բանտարկության ( առանց համաներման իրավունքի) չեղարկման շնորհիվ : Նախօրեին դրա շնորհիվ անցկացվել է դատարանի կրկնակի նիստ, որի ժամանակ Թայլերը ընդունել է իր մեղքը ու դատապարտվել 21 տարվա ազատազրկման եւ քանի որ նա արդեն կրկնակի շատ է անցկացրել բանտում, նրան միանգամից ազատել են, հայտնում է ՏԱՍՍ-ը: