Եվրամիությունը ղարաբաղյան հակամարտության կողմերին կոչ է անում անհապաղ դադարեցնել մարտական գործողությունները եւ պահպանել հրադադարի ռեժիմը: Այս մասին ասված է Եվրամիության արտաքին գործերի եւ անվտանգության քաղաքականության հարցերով գերագույն հանձնակատար Ֆեդերիկա Մոգերինիի հայտարարության մեջ:
«Շփման գծի երկայնքով թեծ մարտերի մասին տեղեկությունները խորը մտահոգության տեղիք են տալիս: Կողմերը պետք է զսպվածություն ցուցաբերեն եւ խուսափեն որեւէ հետագա գործողությունից կամ հայտարարությունից, որը կարող է հանգեցնել էսկալացիայի:
Եվրամիությունը ցավակցություն է հայտնում մարդկային կորուստների, մասնավորապես քաղաքացիական բնակչության շրջանում զոհերի կապակցությամբ»,- ասված է Մոգերինիի հայտարարության մեջ:
Հայտարարության համաձայն՝ Եվրամիությունը լիովին աջակցում է ԵԱՀԿ ՄԽ եւ երեք համանախագահների ջանքերին: «Մենք ակնկալում ենք, որ երկու կողմն էլ խստորեն կպահպանեն հրադադարի մասին պայմանագիրը, զերծ կմնան ուժ կիրառելուց եւ կվերականգնեն ղարաբաղյան հակամարտության խաղաղ կարգավորման ջանքերը»,- ասված է հայտարարության մեջ:
