ԱՄՆ պետքարտուղար Ջոն Քերրին վճռականորեն դատապարտել է ղարաբաղյան հակամարտության գոտու շփման գծում հրադադարի լայնածավալ խախտումը, որի հետեւանքով զոհեր կան, այդ թվում՝ խաղաղ բնակչության շրջանում:
Քերրին ցավակցություն է հայտնել զոհվածների ընտանիքներին՝ կողմերին կոչ անելով «զսպվածություն ցուցաբերել, խուսափել իրադրության հետագա սրացումից եւ խստորեն հետեւել հրադադարի մասին համաձայնագրին: Տեղերում անկայուն իրավիճակը ցույց է տալիս, թե ինչու կողմերը պետք է անհապաղ բանակցությունների սեղանի շուրջ նստեն՝ ԵԱՀԿ Մինսկի խմբի համանախագահների հովանո ներքո հակամարտության համապարփակ կարգավորման հասնելու համար»:
Նա նաեւ հայտարարել է, որ հակամարտության ռազմական լուծում գոյություն չունի: «Որպես համանախագահող երկիր՝ ԱՄՆ-ն հավատարիմ է կողմերի հետ աշխատանքին՝ բանացությունների միջոցով կայուն խաղաղության հասնելու համար»,- ասված է հայտարարությունում: