Ղարաբաղյան հակամարտության պատճառով Հռոմի Ֆրանցիսկոսը Պապը հրաժարվել է նույն այցի շրջանակում այցելել եւ Հայաստան, եւ Ադրբեջան: Հռոմի Պապը հունիսի 24-26–ը կլինի Հայաստանում, իսկ հոկտեմբերի սկզբին կմեկնի Ադրբեջան եւ Վրաստան, գրում է Rome Reports-ը: Ըստ իտալական պարբերականի՝ Հռոմի պապին բարդ այցելություն է սպասվում, նա փորձելու է նպաստել Թուրքիայի եւ Ադրբեջանի հետ Հայաստանի հաշտեցմանը: Իր հերթին Սուրբ աթոռի մամուլի քարուղար Ֆեդերիկո Լոմբարդին ասել է, որ  իր այցով Հռոմի պապն ընդգծելու է իր ջերմ վերաբերմունքը հայ ժողովրդի հանդեպ, որն այդքան տառապանք է տեսել իր երկար պատմության ընթացքում: Հայաստանում  Հռոմի պապը հանդիպելու է Ցեղասպանության զոհերի ժառանգների հետ: Իսկ այցի վերջին օրը Ֆրանցիսկոս պապը կլինի Խոր Վիրապում, որտեղ աղավնիներ բաց կթողնի Արարատ լեռան ուղղությամբ: Միաժամանակ, ռուսական լրատվամիջոցները հաղորդում են, որ Ռուսաստանից ուխտագնացների խումբը Երեւան է ժամանելու 25 հազար կաթոլիկների հետ միասին աղոթելու Գյումրիում Հռոմի պապի մատուցելիք պատարագի ժամանակ: Նշենք, որ պապի այցին ընդառաջ Հայաստանում մի շարք անակնկալներ են պատրաստվում: Դրանցից մեկը կոմպոզիտոր Գարի Քյոսայանի նոր ստեղծագործությունն է՝ «Ավե Մարիան», որն առաջին անգամ կհնչի Հռոմի Պապի այցի առթիվ կազմակերպված համերգի ընթացքում:

Ապօրինի զենք եւ ռազմամթերք ձեռք բերելու, փոխադրելու եւ պահելու մեջ կասկածվող Ժիրայր Սեֆիլյանը հրաժարվում է ցուցմունք տալ: Ազատամարտիկն իր  երեք պաշտպանների հետ այսօր քննչական գործողությունների է մասնակցել՝ այդ թվում առերեսման: Սեֆիլյանն իրեն այցելած փաստաբաններին ու պատգամավոր Նիկոլ Փաշինյանին ասել է, որ տեղի ունեցածը համարում է քաղաքական հալածանք, իսկ իրեն վերագրվող մեղադրանքները՝ անհեթեթություն:

Սեֆիլյանի ձերբակալությունը դատապարտող հայտարարությամբ է հանդես եկել «Ժառանգությունը»: Կուսակցության տարածած հաղորդագրությունում ասվում է, որ դա պայմանավորված է տարածքային զիջումների եւ, մասնավորապես, արցախյան հակամարտության կարգավորման Մադրիդյան սկզբունքների դեմ վճռականորեն հանդես գալու՝ նրա դիրքորոշմամբ:

Ազգային ժողովի փոխնախագահ Էդուարդ Շարմազանովը համամիտ չէ, որ Սեֆիլյանի ձերբակալությունը քաղաքական հետապնդում է:

Շարմազանովն անդրադարձել է նաեւ  Ազգային ժողովի նիստերից մշտապես բացակայող պատգամավորների աշխատավարձերից պահումներ անելուն: Ըստ նրա՝ այդ պատժամիջոցը տարածվելու է բոլորի, այդ թվում՝ Գագիկ Ծառուկյանի վրա, որը վերջին նստաշրջանի ոչ մի նիստի չի մասնակցել:

Դավիթաշենում նախօրեին երեկոյան ողբերգական դեպք է տեղի ունեցել. դիտահորում աշխատելիս «Երեւան Ջուր» ընկերության երկու աշխատակիցների ինքնազգացողությունը վատացել է: Նրանցից մեկը տեղում մահացել է, մյուսը` տեղափոխվել հիվանդանոց: Նախնական տվյալով՝ նրանք թունավորվել են շմոլ գազից:  Կատարվում է քննություն: «Երեւան ջուր» ընկերությունը հայտարարել է, որ այդ աշխատակիցները մասնավոր գործունեություն են ծավալել:

Գյումրիի տնակներից մեկում հունիսի 20-ին հայտնաբերվել են մոր ու որդու դիերը: Մահացածներին գտել են, երբ հարեւաններն ահազանգել են, որ մի քանի օր Հակոբյանները ելումուտ չեն անում: Քննչական կոմիտեն ավելի ուշ տարածել է հաղորդագրություն, որ 80-ամյա Սիրիկ եւ 60-ամյա Սարգիս Հակոբյանները  մահացել են բռնության հետեւանքով: Դեպքի առթիվ քրեական գործ է հարուցվել:

Եվս մեկ դժբախտ պատահար՝ Լոռու մարզում: Ստեփանավանում կայծակնահարությունից 79-ամյա տղամարդ է մահացել: Թոռը նրան մահացած է գտել դաշտում, ուր ծերունին գնացել էր կովերին արածեցնելու:

«Yandex Taxi» օնլայն ծառայության մուտքը անհանգստացրել է Հայաստանի անհատ տաքսիստներին: Նրանք մտավախություն ունեն, որ առաջին երկու կիլոմետրի համար 100 դրամ մինիմալ վճարով ծառայություն առաջարկող ռուսական տաքսին անհավասար մրցակցություն է առաջացնելու շուկայում: Անհատ տաքսիստների մտահոգությունները ներկայացրել է «Ավտովարորդների պաշտպանության լիգայի» նախագահ Տիգան Հովհաննիսյանը: Նրա խոսքով՝ տաքսիստները սպառնում են, որ թույլ չեն տալու ռուսական ընկերության մուտքը հայկական շուկա, հատկապես որ «Yandex Taxi»-ն մտադիր է համագործակցել միայն տաքսի ծառայությունների հետ, բայց ոչ անհատ տաքսիտների:

Ծանրամարտի միջազգային ֆեդերացիան դոպինգի պատճառով ժամանակավորապես որակազրկել է Հռիփսիմե Խուրշուդյանին: Նրա դոպինգ թեստը հայտնաբերել է ստանոզոլոլ, որը համարվում է արգելված խթանիչ: Նմուշը 2008թ. Պեկինի Օլիմպիական խաղերի ժամանակ անցած դոպինգ թեստից է: Կմասնակցի արդյոք Եվրոպայի կրկնակի չեմպիոն, Լոնդոնի Օլիմպիական խաղերի բրոնզե մեդալակիր Խուրշուդյանը Ռիոյի Օլիմպիական խաղերին, կորոշի Միջազգային օլիմպիական կոմիտեն գործն ուսումնասիրելուց հետո:

Միջազգային մամուլը շարունակում է ակտիվ քննարկել, թե ուր կտեղափոխվի Հենրիխ Մխիթարյանի, որի պայմանագիրը Դորտմունդի «Բորուսիայի» հետ ավատվում է 2017-ի ամռանը: Լրատվամիջոցները գրում են, որ «Մանչեսթեր Յունայթեդը» կիսապաշտպանին ձեռք բերելու համար առաջարկել է 25 միլիոն եվրո, սակայն մերժում է ստացել: «Բորուսիան» Մխիթարյանի համար պահանջում է 40 միլիոն եվրո: Նշենք, որ Մխիթարյանը չի ցանկանում երկարաձգել պայմանագիրը գերմանական ակումբի հետ:

Այսօր աճել է միայն ֆունտի փոխարժեքը, մյուս երեք հիմնական արտարժույթներինը՝ նվազել է: Եվ այսպես դոլարի փոխարժեքը կազմել է 476, ռուբլունը՝ 7.43, եվրոյինը՝ 540, ֆունտինը՝ 703 դրամ:

Երեւանում հունիսի 22-ին անձրևի հավանականությունը փոքր է: Առաջիկա գիշերը մայրաքաղաքում սպասվում է +19+21, իսկ վաղը ցերեկը՝ +31+33 աստիճան տաքություն։