Զոհված զինծառայողների ընտանիքները միանվագ 10 միլիոն դրամ ապահովագրական գումար կստանան: Պաշտպանության նախարարը հանրապետության նախագահին զեկուցել է զինծառայողների զոհվելու կամ հաշմանդամություն ստանալու դեպքում պետական ապահովագրական վճարները կտրուկ ավելացնելու ծրագրի մշակման ավարտի մասին:
Ծրագիրը կգործի 2017 թվականի փետրվարի 28-ից: Զոհված եւ առաջին կարգի հաշմանդամություն ստացած զինծառայողների ընտանիքները կստանան միանվագ 10 մլն. դրամ ապահովագրական վճար, երկրորդ կարգի հաշմանդամ զինծառայողներին կհատկացվի միանվագ 5 մլն. դրամ: Ձեւավորվելու է խորհուրդ, որը վերահսկելու է, որ գործընթացն ամբողջությամբ թափանցիկ եւ հրապարակային լինի հասարակության համար:
Ծրագրեր մշակեք, թուղթ ու գրիչով գրեք ու ներկայացրեք: Վարչապետի հորդորն է տեղեկատվության եւ հեռահաղորդակցության տեխնոլոգիաների ոլորտի ներկայացուցիչներին: Կառավարությունում այսօր ոլորտի զարգացման խնդիրներին նվիրված հերթական քննարկումն է տեղի ունեցել: Կարեն Կարապետյանն ընդգծել է, որ որակական փոփոխություններին միտված ծրագրեր է ակնկալում, որոնք կարճաժամկետ հեռանկարում տեսանելի արդյունք կտան եւ կնպաստեն ոլորտի աշխուժացմանը:
Արագածոտնի մարզի Աղձք համայնքում այսօր նույնպես կրքերը թեժ էին: Երեկվանից գյուղի դպրոցականները դասադուլ են անում, իսկ այսօր նրանց են միացել նաեւ ծնողները՝ բողոքելով տնօրենի ժամանակավոր պաշտոնակատար նշանակված անձի դեմ: Ասում են՝ առանց հիմնավորման դպրոցի տնօրենին ազատել են աշխատանքից, եւ ժամանակավոր պաշտոնակատար նշանակել Փարպի գյուղից Սոնա Միքայելյանին: Գյուղացիները պնդում են, թե սա քաղաքական խաղ է. դաշնակցական մարզպետն իր սանիկին է նշանակել: Գաբրիել Գյոզալյանը, սակայն, հերքում է ազգակցական կամ կուսակցական կապը: Ավելի ուշ հաջողվել է աշակերտներին համոզել վաղվանից վերսկսել դասերը, իսկ մեկ ամիս անց տնօրենների քննություններ են, եւ կրթօջախը նոր ղեկավար կունենա:
Աբովյան քաղաքում հոկտեմբերի 31-ին դանակահարված «Օլե» գիշերային ակումբի տնօրենը հիվանդանոցում մահացել է: 31-ամյա Մամիկոն Գրիգորյանը վնասվածք էր ստացել գլխի շրջանում, բժիշկները 8 ժամ տեւած վիրահատության միջոցով են միայն կարողացել դանակը հեռացնել գլխից: Ավելի վաղ պարզվել էր, որ Գրիգորյանին դանակահարել է ակումբի հաճախորդներից մեկը։
Տեւական հիմնանորոգումից հետո բացվել է Երեւանի սիրված մշակութային օջախներից մեկը՝ Մարտիրոս Սարյանի տուն-թանգարանը: Այս ընթացքում բազմաթիվ աշխատանքներ են արվել. ամրացվել են շենքի հիմքերը, կրող պատերը, կառուցվել է միջոցառումների համար նախատեսված առանձին դահլիճով լրացուցիչ 4-րդ հարկ, բաց պատշգամբը վերածվել է գրադարանի եւ այլն: Այսուհետ նաեւ թանգարանը հասանելի կլինի հենաշարժական խնդիրներ ունեցող այցելուների համար: Թանգարանի բացմանն այսօր մասնակցել է նաեւ հանրապետության նախագահը:
Նոյեմբերի 8-ին դոլարն ու եվրոն ամրապնդել են դիրքերը: Արդյունքում դոլարի փոխարժեքը կազմել է 479 դրամ, եվրոյինը՝ 529, ռուբլունը՝ 7 դրամ 53 լումա, ֆունտինը՝ 595 դրամ։
Նոյեմբերի 9-ին հանրապետության տարածքում սպասվում է առանց տեղումների եղանակ: Օդի ջերմաստիճանն աստիճանաբար կբարձրանա 2-3 աստիճանով: Երեւանում նույնպես վաղը տեղումներ չեն սպասվում: