N զորամասի տարածքում նոյեմբերի 17-ին ուշ երեկոյան մահացած հայտնաբերված Իվան Հայրապետյանը Տավուշի մարզի Նորաշեն համայնքից էր, ծառայության էր անցել 3-4 տարի առաջ: Այս մասին NEWS.am-ին ասաց համայնքի ղեկավար Գոռ Աբրահամյանը:
«23 տարեկան էր ընդամենը: Շատ խելոք տղա էր, ինչքան գիտենք, ծառայության ընթացքում ոչ մի խնդիր չի ունեցել: Թե ինչ է տեղի ունեցել, մեզ էլ հայտնի չէ»,- ասաց գյուղապետը:
Ըստ Քննչական կոմիտեի տարածած հաղորդագրության՝ նոյեմբերի 17-ին ժամը 21:50-ի սահմաններում N զորամասի 1-ին հրաձգային գումարտակի հսկիչ-անցագրային կետի շինությունում հայտնաբերվել է 2016 թվականի նոյեմբերի 17-ից մինչև 18-ը գումարտակի արագ արձագանքման խմբում ծառայության ընդգրկված նույն գումարտակի գնդացրորդ, պայմանագրային զինծառայող Իվան Դավիթի Հայրապետյանի դիակը` բերանի աջ ստորին և գլխի ձախ գագաթային հատվածներում միջանցիկ հրազենային վնասվածքներով:
Դեպքի առթիվ հարուցվել է քրեական գործ Քրեական օրենսգրքի 110-րդ հոդվածի 1-ին մասի հատկանիշներով (սպառնալիքի, դաժան վերաբերմունքի կամ անձնական արժանապատվությունը պարբերաբար նվաստացնելու ճանապարհով անձին անուղղակի դիտավորությամբ կամ անզգուշությամբ ինքնասպանության կամ ինքնասպանության փորձի հասցնելը): Ձեռնարկվում են անհրաժեշտ քննչական գործողություններ՝ դեպքի բոլոր հանգամանքները պարզելու ուղղությամբ:
